Mumbai News : रील बनवण्याच्या नादात खोल विहिरीत पडला; डोंबिवलीतील धक्कादायक घटना

डोंबिवली - ठाकुर्ली येथील पंप हाऊस जवळील खोल विहिरीत पडून 18 वर्षीय बिलाल शेख या तरुणाचा मृत्यू झाला आहे. मुंब्रा येथून तो ठाकुर्ली येथे मित्रांसोबत रील बनविण्यासाठी आला होता. मात्र त्याचे हे रील वेड त्याच्या आयुष्याचा शेवट करणारे ठरले.

मुंब्रा येथे राहणार बिलाल साहिल शेख हा तरुण रविवारी ठाकुर्ली येथे मित्रांसोबत आला होता. पंप हाऊस जवळ रील बनवत असताना बिलाल हा खोल विहिरीत पडला. बिलाल पडल्याने मित्रांनी आरडा ओरडा केला पण आजूबाजूला कोणीच नव्हते. बाजूला रेल्वे सुरक्षा बलाकडे धाव घेत बिलाल विहिरीत पडल्याचे सांगितले.

रेल्वे सुरक्षा बलाने तातडीने याची माहिती विष्णूनगर पोलिसांना दिली. पोलिसांनी डोंबिवली पश्चिमेकडील अग्निशामक दलास माहिती दिली. स्थानक अधिकारी रामचंद्र महाला, विनय कोयंदे, राजेश कासवे, केदार मराठे, महिला कर्मचारी या पथकांनी सदर ठिकाणी शोध कार्य सुरु केले. अखेर 32 तासाच्या अथक प्रयत्नानंतर सोमवारी सायंकाळी बिलाला याचा मृतदेह अग्निशामक दलाच्या जवानांना बाहेर काढण्यात यश आले.