अतिरिक्त पोलीस आयुक्तांच्या गाडीला कंटेनरची धडक

डोंबिवली - कल्याणचे अतिरिक्त पोलीस आयुक्त दत्तात्रय शिंदे यांच्या गाडीला एका कंटेनरने धडक दिल्याची घटना सोमवारी सायंकाळी घडली.

नेवाळी नाका येथे स्पीड ब्रेकरवर चालकाने गाडी स्लो करताच मागून येणाऱ्या कंटेनरने ही धडक दिली आहे. सुदैवानं यामध्ये कुणालाही इजा झालेली नाही. याप्रकरणी हिललाईन पोलीस ठाण्यात गुन्हा दाखल करण्यात आला आहे.

कल्याणचे अतिरिक्त पोलीस आयुक्त दत्तात्रय शिंदे हे सोमवारी सायंकाळी मलंगगड परिसरात आले होते. ललिता पंचमीला मलंगगडावर होणाऱ्या पालखी सोहळ्याच्या पार्श्वभूमीवर पाहणी करण्यासाठी शिंदे हे पोलीस उपायुक्त, सहाय्यक पोलीस आयुक्त आणि परिमंडळ ४ मधील सर्व वरिष्ठ पोलीस निरीक्षक यांच्यासह मलंगगडावर आले होते. तिथून परतत असताना नेवाळी पोलीस चौकीजवळ त्यांची गाडी येताच समोर स्पीड ब्रेकर आल्यानं चालकाने ब्रेक मारत गाडीचा वेग कमी केला.

यावेळी मागून आलेल्या भरधाव कंटेनरने अतिरिक्त पोलीस आयुक्तांच्या गाडीला धडक दिली. यामध्ये गाडीचं बरंच नुकसान झालं असलं, तरी सुदैवानं अतिरिक्त आयुक्त शिंदे आणि त्यांच्या ताफ्यातील कर्मचाऱ्यांना काहीही इजा झालेली नाही.

याप्रकरणी कंटेनर चालक मोहम्मद परवेझ खान याच्याविरोधात गुन्हा दाखल करून त्याच्यावर कारवाई करण्यात आल्याची माहिती हिललाईन पोलीस ठाण्याचे वरिष्ठ पोलीस निरीक्षक रणजित डेरे यांनी दिली.