मुंबई : ‘एटीएम’मधून पैसे काढणे एक मेपासून महागणार आहे. ग्राहकांना मोफत व्यवहारांची मर्यादा ओलांडल्यानंतर द्याव्या लागणाऱ्या इंटरचेंज शुल्कात वाढ करण्यात आली आहे. भारतीय रिझर्व्ह बँकेने नुकतीच एक अधिसूचना जारी करून ही माहिती दिली आहे..या अधिकृत अधिसूचनेनुसार, एक मेपासून, ग्राहकांना मोफत मर्यादा संपल्यानंतर ‘एटीएम’मधून होणाऱ्या प्रत्येक आर्थिक व्यवहारासाठी अतिरिक्त दोन रुपये द्यावे लागतील. या शुल्कवाढीमुळे, एटीएममधून पैसे काढण्यासाठी प्रत्येक व्यवहारावर १९ रुपये शुल्क भरावे लागेल, जे पूर्वी १७ रुपये होते. बिगर-आर्थिक व्यवहारांसाठीचे शुल्कही एक रुपयाने वाढवण्यात आले आहे. त्यामुळे खात्यातील शिल्लक तपासण्यासारख्या व्यवहारांसाठी आता प्रत्येक वेळी सहा रुपयांऐवजी सात रुपये आकारले जातील..व्हाईट-लेबल एटीएम ऑपरेटरच्या विनंतीनंतर रिझर्व्ह बँकेने हे शुल्क वाढविण्याचा निर्णय घेतला आहे. एटीएमच्या कामकाजासाठी होणाऱ्या खर्चात वाढ झाल्याने व्यवसायावर परिणाम होत असल्याचे या व्यावसायिकांनी म्हटले होते. डिजिटल पेमेंटमुळे एटीएम सेवांवर परिणाम झाला आहे. ऑनलाइन वॉलेट आणि यूपीआय व्यवहारांच्या सुविधेमुळे रोख रक्कम काढण्याचे प्रमाण घटले आहे..ग्राहकांना दरमहा काही ‘एटीएम’मधून पैसे काढण्याचे व्यवहार मोफत करता येतात. महानगरांमध्ये हे प्रमाण पाच व्यवहार इतके आहे, तर छोट्या शहरांमध्ये तीन आहे. मोफत व्यवहारांच्या संख्येनंतर केल्या जाणाऱ्या व्यवहारांसाठी ग्राहकांना अतिरिक्त शुल्क भरावे लागते. ‘एटीएम’ शुल्कात झालेल्या वाढीचा फटका लहान बँकांच्या ग्राहकांना बसू शकतो. या बँका ‘एटीएम’ पायाभूत सुविधा आणि संबंधित सेवांसाठी मोठ्या वित्तीय संस्थांवर अवलंबून असतात. .त्यामुळे त्यांच्या खर्चात वाढ होणार आहे. रिझर्व्ह बँकेच्या या निर्णयामुळे डिजिटल व्यवहारांना आणखी चालना मिळण्याची शक्यता आहे. हे व्यवहार अधिक सुलभ आणि कमी खर्चिक आहेत. ‘एटीएम’मधून पैसे काढण्याचा खर्च वाढल्याने आता ग्राहक डिजिटल व्यवहार पद्धतीचा अधिकाधिक वापर करण्याकडे वळण्याची शक्यता आहे. सरकार रोख व्यवहारांचे प्रमाण कमी करण्यासाठी डिजिटल व्यवहारांना प्रोत्साहन देत आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
