बाळा नांदगावकर यांनी हंडी फोडलीच; पोलीस-मनसे आमनेसामने

मुंबई- राज्य सरकारचा आदेश झुगारुन दही हंडी उत्सव साजरा करण्याचा निर्धार महाराष्ट्र नवनिर्माण सेनेने केला आहे. याप्रकरणात काळाचौकी येथे मनसे नेते बाळा नांदगावकर यांनी निर्बंध असतानाही दही हंडी फोडली आहे. त्यामुळे त्यांना आणि मनसे कार्यकर्त्यांना पोलिसांनी ताब्यात घेतले आहे. मनसे कार्यकर्ते आणि पोलीस आमनेसामने आल्याचा पाहायला मिळत आहे. (Mhatashtra Latest News)

विरोध फक्त सणांना का? राजकीय नेते रॅली काढतात, सभा घेतात. त्याला मोठ्या प्रमाणात गर्दी होत असते. यावेळी कोरोनाचा प्रसार होत नाही का? असा सवाल मनसेकडून करण्यात आला आहे. हिंदू सणांनाच विरोध का? सण साजरे केल्यानंतरच कोरोनाचा प्रसार होतो का? हिंदूंचे सण साजरेच करणार. आज दही हंडी फोडली याचा आनंद आहे, अशी प्रतिक्रिया बाळानांदगावकर यांनी दिली. नांदगावकर यांनी हंडी फोडल्यानंतर पोलिसांनी त्यांच्यासह इतर काही मनसे कार्यकर्त्यांना ताब्यात घेतले आहे.

महाराष्ट्र सरकारने दहीहंडी उत्सव साजरा करण्यावर बंदी घातलीये. कोरोनाच्या पार्श्वभूमीवर हा निर्णय घेण्यात आला आहे. पण महाराष्ट्र नवनिर्माण सेनेला ठाकरे सरकारच्या या निर्णयाच्या विरोधात भूमिका घेतली आहे. हा निर्णय मान्य नसून त्यांनी दहीहंडी उत्सव साजरा करणारच, असा इशारा मनसेने दिला आहे. मनसेचे नेते दहीहंडीसाठी आक्रमक झाल्याचे पाहायला मिळत आहेत.

मनसेने दहीहंडीवर बंदी घालण्याचा विषय हिंदू सणांशी जोडला आहे. रात्रीपासूनच मुंबईत ठिकठिकाणी मनसे नेत्यांच्या मार्गदर्शनाखाली थर रचून दहीहंड्या फोडण्यात येत आहेत. मनसेकडून साजऱ्या होणाऱ्या या दहीहंडी उत्सवाचे व्हिडीओ सुद्धा व्हायरल झाले आहेत. लोक एकत्र आल्यास कोरोनाचा प्रसार होईल, या भीतीपोटी राज्य सरकारने दहीहंडी उत्सव साजरा करण्यावर बंदी घातलीय.