Mumbai Crime : बँक फसवणूक प्रकरणी जेट एअरवेजचे नरेश गोयलांविरोधात ईडीने केला गुन्हा दाखल

मुंबई - जेट एअरवेजचे प्रवर्तक नरेश गोयल व इतर आरोपींविरोधात ईडीने नवीन गुन्हा दाखल केला आहे. कॅनरा बँकेने दिलेल्या तक्रारीच्या आधारावर सीबीआयने फसवणुकीचा गुन्हा दाखल केला होता.

या प्रकरणात मनी लॉड्रीगच्या आरोपातून ईडीने गुन्हा दाखल केला आहे. याप्रकरणी बुधवारी मुंबई व दिल्लीतील आठ ठिकाणी ईडीने छापेमारी केली आहे. या कारवाईत गोयल यांच्या संबंधित ठिकाणांचाही समावेश आहे.

कॅनरा बँकेचे वरिष्ठ अधिकारी पी. संतोष यांनी 23 नोव्हेंबर 2022 ला सीबीआयकडे या प्रकरणी तक्रार केली होती. 3 मे 2023 रोजी गोयल यांच्यासह इतर आरोपींविरोधात सीबीआयने गुन्हा दाखल केला होता. आरोपींनी फसवणूक, गुन्हेगारी कट रचणे, फौजदारी विश्वासघात, गुन्हेगारी नियमभंग केल्याचा आरोप करण्यात आला आहे.

कॅनरा बँकेच्या कफ परेड येथील कॉर्पोरेट कार्यालयाद्वारे कर्ज पुरवठा जेट एअरवेजला करण्यात आला होता. जेट एअरवेजचे खाते बँकेने 5 जून 2019 मध्ये बुडीत घोषित केले होते. त्यानुसार 538 कोटी 62 लाख रुपये बँकेचे नुकसान झाले होते.

याबाबत बँकेकडून पडताळणी करण्यात आली असता बँकेकडून देण्यात आलेला निधी इतर ठिकाणी वळवण्यात आल्याचे उघड झाले. या प्रकरणात अज्ञात सरकारी अधिकाऱ्यावरही गुन्हा दाखल करण्यात आला असून त्यांनी आरोपींना मदत केल्याचा संशय तक्रारीत व्यक्त करण्यात आला आहे.