Mumbai : पोलीस भरती प्रक्रिये दरम्यान उमेदवाराचा मृत्यू

मुंबई - मुंबई पोलीस दलातील भरतीची प्रक्रिये दरम्यान सांताक्रुझच्या कलिना येथील कोळे कल्याण मैदानात एका उमेदवाराचा शुक्रवारी सकाळी मृत्यू झाला. मैदानी चाचणीदरम्यान चक्कर आल्याने हा तरुण कोसळला.

गणेश उगले असे या तरूणाचे नाव असून 1600 मीटर धावण्याची चाचणी पूर्ण केली असता तो खाली कोसळला. यानंतर गणेश उगलेला सांताक्रूझ येथील व्हीएन देसाई रुग्णालयात नेण्यात आले, तेथे डॉक्टरांनी त्याला मृत घोषित केले. मृत गणेश उगले 27 वर्षाचा असून मूळचा वाशिमचा आहे.

गणेश उगले मुंबईत आपल्या चुलत भावासोबत गुरूवारी आला होता. मुंबई बाहेरून येणाऱ्या उमेदवारांसाठी शासनातर्फे केलेल्या तात्पुरती व्यवस्थेत दोघांनी गुरूवारी रात्री मुक्काम केला. शुक्रवारी सकाळी लवकर उठून गणेश उगले भरती प्रक्रियेत सहभागी झाला.

या घटनेनंतर पोलिसांनी त्याच्याकडे गणेशसंदर्भात चौकशी केली असता सकाळपासून त्याची प्रकृतीबाबत कोणतीच तक्रार नसल्याची गणेशच्या चुलत भावाने पोलिसाना माहिती दिली. या प्रकरणी पोलिसांनी अपघाती मृत्यूची नोंद केली आहे.