Air India Penalty: एअर इंडियाला दणका! वृद्ध व्यक्तीच्या मृत्यूप्रकरणी तब्बल ३० लाखांचा दंड

नवी दिल्ली- मुंबई विमानतळावर व्हिलचेअर न मिळाल्याने एका ८० वर्षीय व्यक्तीचा मृत्यू झाल्याचा प्रकार समोर आला होता. याप्रकरणी नागरी विमान वाहतूक महासंचालनालयाने (Directorate General of Civil Aviation) एअर इंडियाला दणका दिला आहे. डीजीसीएने एअर इंडियाला ३० लाखांचा दंड ठोठावला आहे. ( Civil Aviation imposed financial penalty Rs 30 lakhs on Air India after an incident of non availability of a wheelchair old passenger)

वृद्ध जोडप्याला मुंबई विमानतळावर व्हिलचेअर हवे होते. मात्र, त्यांना एकच व्हिलचेअर मिळाले. वृद्ध व्यक्तीने आपल्या पत्नीला व्हिलचेअरवर बसवले. त्यांना विमानापासून खूप अंतर चालावे लागल्याचं सांगितलं जातं. यातच ते पडले आणि त्यांचा मृत्यू झाला. या घटनेमुळे संताप व्यक्त केला जात होता. एअर इंडियाने दोघांसाठी व्हिलचेअरची व्यवस्था करायला हवी होती असा सूर लोकांचा आहे.

मिळालेल्या माहितीनुसार, वृद्ध जोडप्याने तिकीट काढतानाच व्हिलचेअरची मागणी केली होती. तसेच यासाठीचे शुल्क देखील भरले होते. असे असताना त्यांना एकच व्हिलचेअर देण्यात आली. दोघेंही वृद्ध होते, अशा स्थितीत त्यांना विमानापासून खूप अंतर चालावं लागलं. थकल्यामुळे त्यांना भोवळ आली आणि ते खाली पडले. त्यांना हॉस्पिटलमध्ये उपचारासाठी नेण्यात आले, पण डॉक्टरांनी त्यांना मृत घोषित केलं होतं.

याप्रकरणी नागरी विमान वाहतूक प्रशासनाने गंभीर दखल घेतली आहे. एअर इंडियाला या प्रकरणी ३० लाखांचा दंड ठोठावण्यात आला आहे. या दंडामुळे व्यक्तीचं आयुष्य परत मिळणार नसलं तरी अशा हलगर्जीपला चाप लागेल अशी आशा आहे. (Latest Maratahi News)