इतर राज्यांतून आणि परदेशातून मुंबईत येणारे सरासरी 19 नागरिक कोरोना संक्रमित

मुंबई : मुंबईत कोरोनाच्या (corona) दुसऱ्या लाटेचा कहर कमी होत आहे आणि तिसऱ्या लाटेची चिंता (corona) कायम आहे. दरम्यान, एक धक्कादायक बातमी समोर आली आहे. पालिका आरोग्य विभागाच्या (BMC) म्हणण्यानुसार, मुंबईत दररोज आढळणाऱ्या नवीन कोरोना रुग्णांपैकी (corona new patients) 4 टक्क्यांहून अधिक रुग्ण हे बाहेरचे जिल्हे, राज्ये आणि परदेशातील आहेत. आरोग्य विभागाच्या अहवालानुसार, दररोज सरासरी 19 नवीन कोरोना रुग्ण मुंबईबाहेरील आहेत जे मुंबईत प्रवेश करताना कोरोना पॉझिटिव्ह (corona positive)आढळले आहेत. तज्ञांच्या विश्वासानुसार,  बाहेरून येणाऱ्या प्रत्येक व्यक्तीची चौकशी केली तर ही संख्या आणखी वाढू शकते.

गेल्या वर्षी नोव्हेंबर महिन्यात राजस्थान, दिल्ली, गुजरातमध्ये कोरोना रुग्णांची संख्या झपाट्याने वाढत होती. ही वाढती संख्या पाहता, राज्य सरकारने स्थानिक संस्थांना या राज्यांतून मुंबईकडे येणाऱ्या प्रवाशांची तपासणी करण्याचे आदेश दिले होते. या आदेशानंतर मुंबईत पालिकेने 25 नोव्हेंबरपासून लांब पल्ल्यांच्या गाड्यांची रेल्वे स्थानकांवर तपासणी सुरू केली. सुरुवातीला पालिकेकडून दिल्ली, राजस्थान, गोवा आणि गुजरात या चार राज्यांमधून येणाऱ्या प्रवाशांची तपासणी केली जात होती. दरम्यान, राज्य सरकारच्या नव्या आदेशानुसार केरळमधून येणाऱ्या प्रवाशांची स्क्रीनिंग 19 फेब्रुवारीपासून सुरू करण्यात आली.

आता प्रत्येक राज्यातून आलेल्या लोकांची तपासणी केली जात आहे. गणेशोत्सवानंतर कोकणातून येणाऱ्या लोकांची चाचणी घेतली जात आहे. यासह, परदेश आणि विविध राज्यांमधून हवाई मार्गाने येणाऱ्या लोकांची कोरोना स्क्रीनिंग आधीपासूनच केली जात आहे. पालिका आरोग्य विभागाने जारी केलेल्या अहवालानुसार, 1 जानेवारी 2021 ते 31 ऑगस्ट या कालावधीत रेल्वे मार्गाने मुंबईत येणाऱ्या 39 लाखांहून अधिक प्रवाशांची तपासणी करण्यात आली. यापैकी 900 हून अधिक लोकांना कोरोनाची लागण झाली आहे.

याशिवाय 8 महिन्यांत देशांतर्गत विमान कंपन्यांद्वारे मुंबईत येणाऱ्या 2 लाखांहून अधिक प्रवाशांची तपासणी करण्यात आली आहे, त्यात 1800 पेक्षा जास्त प्रवासी कोरोना पॉझिटिव्ह असल्याचे आढळून आले आहे. तर, गेल्या 8 महिन्यांत परदेशातून मुंबईला आलेल्या सुमारे एक लाख 24 हजार प्रवाशांची तपासणी करण्यात आली. यामध्ये 1700 पेक्षा जास्त प्रवासी कोरोना पॉझिटिव्ह आढळले आहेत. यासह, गणेशोत्सवानंतर कोकणातून मुंबईत आलेल्या लोकांपैकी 272 जणांना कोरोनाची लागण झाली आहे.

पालिकेचे अतिरिक्त आयुक्त सुरेश काकाणी यांनी सांगितले की, मुंबईत रेल्वेने येणाऱ्या सर्व प्रवाशांची कोरोना चाचणी करणे शक्य नाही. म्हणून, स्क्रीनिंग दरम्यान, संशयित रुग्णांची कोरोना तपासणी केली जाते, त्यापैकी पॉझिटिव्ह रुग्णांना नियमांनुसार वेगळे ठेवण्यात आले आहे. लक्षणे असलेल्या रुग्णांना तातडीने रुग्णालयात दाखल केले जाते आणि उपचार सुरू केले जातात.