Dombivali Crime : इन्स्टाग्राम वरील मैत्रीने केला घात; अल्पवयीन मुलीवर चार जणांचा अत्याचार

डोंबिवली - कल्याण मधील एका 15 वर्षीय अल्पवयीन मुलीवर चार जणांनी अत्याचार केल्याची घटना उघडकीस आली आहे. याप्रकरणी कोळसेवाडी पोलीस ठाण्यात गुन्हा दाखल करण्यात आला आहे.

पोलिसांनी चारही आरोपींना ताब्यात घेतले असून यातील एक आरोपी हा अल्पवयीन आहे. इन्स्टाग्राम वर एका तरुणासोबत मुलीची ओळख झाली होती. या ओळखीतून त्यांनी मुलीला फसवून तिच्यावर अत्याचार केला आहे.

कल्याण मध्ये राहणारी पंधरा वर्षीय पीडित हरवली असल्याची तक्रार तिच्या घरच्यांनी कोळसेवाडी पोलीस ठाण्यात केली होती. त्यानुसार पोलिसांनी तपास केला असता 22 एप्रिलला सकाळी ती कल्याण रेल्वे स्थानक येथे पोलिसांना आढळून आली. पोलिसांनी तिला ताब्यात घेत चौकशी केली असता तिची आरोपी मधील एका तरुणाची मुलीसोबत ओळख झाली होती. मैत्री झालेल्या तरुणानी माझे प्रेयसी सोबत भांडण झाले आहे.

ती माझ्यावर संशय घेत असून तू माझ्यासोबत ये व माझ्या प्रेयसीला आपले अस काहीच नाही हे सांग असे सांगून तिला भेटण्यास बोलवुन घेतले. त्याच्यावर विश्वास ठेवत मुलगी उल्हासनगर येथे गेली. यावेळी त्याने तिला मित्राच्या रूमवर नेऊन तिच्यावर अत्याचार केला. त्यानंतर दुसऱ्या दिवशीही एका मित्राच्या रूमवर नेऊन तिच्यावर अत्याचार केला. त्याने त्याच्या 3 मित्रांना देखील तेथे बोलावून घेतले त्यांनीही तिच्यावर अत्याचार केला.

मुलीच्या तक्रारीवरून सामूहिक अत्याचाराचा गुन्हा कोळसेवाडी पोलीस ठाण्यात दाखल करण्यात आला आहे. पोलिसांनी चार तरुणांना ताब्यात घेतले असून यात एक अल्पवयीन तरुणाचा समावेश आहे. साहिल राजभर, सुजल गवळी आणि विजय बेरा अशी तीन आरोपींची नावे आहेत. अल्पवयीन आरोपीची बाल सुधारगृहात रवानगी करण्यात आली आहे. पुढील तपास वरिष्ट पोलीस निरीक्षक महेंद्र देशमुख यांच्या मार्गदर्शनाखाली पोलीस उपनिरीक्षक दत्तात्रय घोडे हे करत आहेत.