Dombivali News : गायकवाडांच्या नातीला भेटायला फडणवीस आले कल्याणमध्ये; श्रीकांत शिंदेंच्या मतदारसंघात खळबळ

डोंबिवली - कल्याण पूर्वचे आमदार गणपत गायकवाड यांच्या नातीची भेट घेण्यासाठी राज्याचे उपमुख्यमंत्री देवेंद्र फडणवीस हे आज खास करून कल्याण मध्ये आले होते. गायकवाड यांचे सुपुत्र वैभव गायकवाड यांची नुकतेच राजकारणात एन्ट्री झाली आहे.

कल्याण लोकसभेतील युवा नेतृत्व म्हणून वैभव यांच्याकडे पाहिले जात असतानाच, उपमुख्यमंत्री फडणवीस हे त्यांच्या कन्येला भेटण्यासाठी आपल्या व्यस्त दिनक्रमातून वेळात वेळ काढून आल्याने राजकीय वर्तुळात एकच चर्चा रंगली आहे.

यावेळी फडणवीस यांनी पत्रकारांना काही प्रतिक्रिया देणे टाळले असले तरी भाजप पदाधिकाऱ्यांनी मात्र त्यांच्याकडे आपली व्यथा मांडली आहे. पोलीस प्रशासनाकडून भाजप कार्यकर्त्याबाबत दुजाभाव केला जात आहे. आमच्यावर अन्याय होत असून याकडे लक्ष द्यावे अशी विनंती त्यांनी केलो आहे.

राज्याचे उपमुख्यमंत्री देवेंद्र फडणवीस यांनी आज कल्याण पूर्वेचे आमदार गणपत गायकवाड यांच्या घरी सदिच्छा भेट दिली. आमदार गायकवाड यांच्या कार्यालयात सुरवातीला येऊन त्यांनी भाजप पदाधिकाऱ्यांची भेट घेतली. यावेळी आमदार गणपत गायकवाड, माजी आमदार नरेंद्र पवार, कल्याण जिल्हाध्यक्ष नरेंद्र सूर्यवंशी, शशिकांत कांबळे, अभिमन्यू गायकवाड यांसह अनेक पदाधिकारी उपस्थित होते.

यावेळी भाजपचे कल्याण जिल्हाध्यक्ष नरेंद्र यांनी भाजप कार्यकत्यांबाबत पोलिसांकडून दुजाभाव केला जात असल्याचे गाऱ्हाणे उपमुख्यमंत्री फडणवीस यांच्या समोर मांडले. याविषयी सूर्यवंशी म्हणाले, कल्याणच्या वडवली भागात भाजपच्या कार्यकर्त्यावर प्राणघातक हल्ला झाला असून याप्रकरणी पोलिस ठाण्यात संबंधित व्यक्तींविरोधात तक्रार दाखल आहे. मात्र त्यानंतरही पोलीस आरोपीला अटक करत नाही.

तसेच पोलिस प्रशासन भाजप कार्यकर्त्यांबाबत दुजाभाव करत असल्याचे आपण उपमुख्यमंत्री देवेंद्र फडणवीस यांच्या लक्षात आणून दिले आहे. त्यावर उपमुख्यमंत्री देवेंद्र फडणवीस यांनी आपण याप्रकरणी लक्ष घालू असे आश्वासित केल्याचेही सूर्यवंशी यांनी यावेळी सांगितले. सत्ताधारी पक्षातील असूनही आमच्यावर अन्याय होत आहे असे देखील सूर्यवंशी यांनी प्रसिद्धी माध्यमांना सांगितले.

विकास कामाबाबत देखील प्रशासन भाजपचे माजी नगरसेवक लोकप्रतिनिधींना डावलत असल्याचे देखील पदाधिकाऱ्यांनी उपमुख्यमंत्री फडणवीस यांच्या निदर्शनास आणून दिले. या भेटीदरम्यान भाजप पदाधिकाऱ्यांचा रोख सत्ताधारी शिवसेना शिंदे गटाकडे होता. एकंदरीतच कल्याण लोकसभा मतदारसंघात शिवसेना शिंदे गट व भाजप मधील वाद अनेकदा चव्हाट्यावर आला आहे.

याबाबत भाजप व शिंदे गटाच्या वरिष्ठ नेत्यांनी मध्यस्थी करत हा वाद मिटला असल्याचे स्पष्टीकरण दिले होते. मात्र आज पुन्हा एकदा भाजप पदाधिकाऱ्यांनी सत्तेत असूनही भाजपसोबत दुजाभाव केला जात असल्याची व्यथा फडणवीस यांच्यासमोर मांडली.

दरम्यान फडणवीस राजकारणात नव्याने एन्ट्री झालेले वैभव गायकवाड यांच्या मुलीला भेटण्यासाठी वेळात वेळ काढून कल्याण मध्ये आल्याने गायकवाड आणि फडणवीस यांच्या सलोख्याच्या वेगळ्या चर्चा राजकीय वर्तुळात रंगत आहेत. युवा नेतृत्व म्हणून वैभव यांच्याकडे पाहिले जात असतानाच त्यांच्यावर लवकरच पक्ष मोठी जबाबदारी सोपवणार का? याची ही चर्चा सुरू झाली आहे.