Flower Demand : फुलांची मागणी वाढली मात्र आवक घटली; अयोध्या सोहळ्यामुळे फुल मार्केटला फटका

मुंबई - अयोध्येत सोमवारी होणाऱ्या रामलल्ला प्राणप्रतिष्ठा सोहळ्याच्या पार्श्वभूमीवर दादर येथील फूल बाजारात फुलांची मागणी वाढली आहे. मात्र बहुतांश फुल उत्पादक शेतकरी, व्यापारी त्यांचा माल अयोध्येला पाठवत असल्यामुळे बाजारात फुलांची आवक ३० ते ४० टक्क्याने कमी झाली आहे. त्यामुळे फुलांच भाव गगनाला भिडले आहेत.

महाराष्ट्रात गणेशोस्तव, दसरा व दिवाळी हे मोठे सण आहेत.या सणाला फुलांची खुप मोठी मागणी असते. मात्र पहिल्यांदा अयोध्येतील राम मंदिराच्या सोहळ्यामुळे फुल मार्केटमध्ये तेजी आली आहे. सोमवारी मुंबईत सार्वजनिक ठिकाणी, मंदिर तसेच घरोघरी विविध धार्मिक कार्यक्रमाचे आयोजन करण्यात आले आहे. त्यामुळे फुल खरेदीसाठी मागणी वाढली आहे.

मात्र फुल मार्केटमध्ये विविध राज्यातून येणाऱ्या फूलांची आवक कमी झाली आहे. कारण बहुतांश फूल उत्पादक शेतकऱ्यांनी माल राममंदिरच्या सजावटी करिता अयोध्येला वळवला आहे. दुसरी बाब म्हणजे राज्यात कडाक्याची थंडी पडली आहे. त्यामुळे फुलांची वाढ कमी होत आहे. या सर्व कारणामुळे फुलांची आवक ४० टक्क्याने कमी झाली असून गेल्या चार दिवसापासून सर्व प्रकारच्या फुलांचे दर मात्र भरमसाठ वाढले आहे.

फुलांचे दर वाढल्यामुळे सामान्य नागरिकांच्या खिशाला कात्री बसत आहे. शिवाय माळ, हार, फुलांचे बुके तयार करण्याच्या व्यवसायावर मोठा परिणाम झाला आहे. सध्या झेंडूची फुलांचे दर प्रतिकिलो १०० रुपयावर पोहोचले आहे. चमेली व मोगरा 1200 ते 1500 रुपये प्रतिकिलोने मिळत आहेत.

अयोध्येच्या कार्यक्रमामुळे फूल बाजारात आवक कमी झाली आहे. पुरवठा कमी आणि मागणी जास्त आहे. त्यामुळे फुलांचे दर वाढले आहेत.

- रविंद्र इजीप, मालक, अशोक फ्लॉवर

अजून चार ते पाच दिवस फुलांचे दर चढे राहणार आहे. पुढच्या दोन दिवसात किती आवक वाढेल व किती खप होइल यावर फायद्याचे गणित अवलंबून आहे.

- सुरेंद्र जाधव, फूल व्यापारी

फुलांचे दर आमच्या अवाक्याबाहेर आहेत.एरवी अतिशय स्वस्त मिळणारी फुले चढ्या दरात विकणे सुरु आहे.

- सुनीता व्हावळ, ग्राहक

फुलांचे दर भिडले गगनाला

प्रतिकिलो दर

झेंडू -१०० रुपये

जूई- ८०० ते १२०० रुपये

अबोली - ४८० रुपये ५०० रुपये

कन्हेरी - ६०० रुपये

मोगरा- १२०० रुपये

लाल चमेली - १२०० रुपये

सफेद चमेली - १२०० रुपये

शेवंती- 160 ते 200 रुपये

गुलाब हार. एक नग 200 रुपये

गुलाब 20 नग 150 रुपये

कमळ फूल- 40 रुपये नग, डजन- 500रुपये

सोन चाफा शंभर नग- 300 रुपये

जास्वंदी- 6 नग 20 ते 50 रुपये

तरड़- हार एक नग -500 रुपये

गोंडा तोरण- 1 मिटर - 100 रुपये

साधी वेणी - एक नग- 50 रुपये

तुळस एक नग- 20 रुपये