‘गेटवे ऑफ इंडिया’ परिसरात कार्यक्रमासाठी लागणार शुल्क; नियमावली निश्चित

मुंबई : मुंबई शहराचे मानचिन्ह असलेल्या ‘गेटवे ऑफ इंडिया’ (Gateway of India) या राज्य संरक्षित स्मारकाच्या परिसरात शासकीय विभाग, खाजगी आणि गैरशासकीय संस्था यांच्यातर्फे आयोजित कार्यक्रमासाठी पर्यटन आणि सांस्कृतिक कार्य विभागामार्फत नियमावली व शुल्क निर्धारण निश्चित करण्यात आले आहे. ‘गेट वे ऑफ इंडिया’ हे पुरातत्त्व व वस्तुसंग्रहालये संचालनालयाचे ‘अ’ गटात असलेले राज्य संरक्षित स्मारक आहे, हे विशेष... (Gateway of India Latest Marathi News)

‘गेटवे ऑफ इंडिया’ (Gateway of India) येथे भारतीय सेना दल, हवाई दल व नौदलाने कार्यक्रम सादर केल्यास व प्रकाशयोजनेचे कोणतेही शुल्क आकारण्यात येणार नाही. पोलिस व निमलष्करी दल यांच्यामार्फतही कार्यक्रम असल्यास शुल्क आकारण्यात येणार नाही. मात्र, शासकीय विभागाचा कार्यक्रम असल्यास प्रत्येक दिवशी ५० हजार रुपये आणि प्रकाशयोजनेसाठी प्रति दिवस १० हजार रुपये शुल्क आकारण्यात येणार आहे.

असे आकारले जाणार दर

• अव्यावसायिक/स्वयंसेवी संस्था, धर्मादाय संस्थेसाठी प्रत्येक दिवशी एक लाख रुपये आणि प्रकाशयोजनेसाठी प्रति दिवस ५० हजार रुपये शुल्क

• व्यावसायिक कार्यक्रम, व्यवस्थापन संस्थेने कार्यक्रम आयोजित केल्यास प्रत्येक दिवशी ५ लाख रुपये आणि प्रकाशयोजनेसाठी प्रति दिवस एक लाख रुपये शुल्क

• विदेशी दूतावासामार्फत आयोजित कार्यक्रमासाठी एक लाख रुपये आणि प्रकाशयोजनेसाठी प्रति दिवस दहा हजार रुपये शुल्क

• कार्यक्रमाच्या नियोजित तारखेच्या कमीत कमी २१ दिवस आधी अर्ज संचालनालयास प्राप्त होणे आवश्यक आहे.

• अर्ज उशिरा प्राप्त होऊन नियोजित तारीख उपलब्ध असल्यास एक लाख रुपये इतके जलद शुल्क आवेदकांना भरावे लागतील.

• शासकीय आस्थापनांचे व दूतावासांचे अर्ज १५ दिवस आधी संचालनालयास प्राप्त होणे आवश्यक आहे.