गुणरत्न सदावर्ते चौकशीसाठी मुंबई पोलिसांच्या ताब्यात

मुंबई : आंदोलक एसटी कर्मचाऱ्यांचे वकील गुणरत्न सदावर्ते यांच्या घरी पोहचले असून, त्यांना चौकशीसाठी ताब्यात घेतले आहे. गुणरत्न सदावर्तेंच्या घरी चार ते पाच पोलीस दाखल झाले असून, कोणतीही पूर्व नोटीस न देता आपल्याला चौकशीसाठी नेत असल्याचे सदावर्ते यांनी म्हटले आहे. तसेच, चौकशीमध्ये पोलिसांना पूर्ण सहकार्य करणार असल्याचे एसटी आंदोलक कर्मचाऱ्यांचे वकील गुणरत्न सदावर्ते यांनी म्हटले आहे. गुणरत्न सदावर्ते यांच्यावर सरकारी कामात अडथळा निर्माण केल्याप्रकरणी पोलिसांनी गुन्हा दाखल केला असून, त्यांना गुणरत्न अटक होण्याची शक्यता वर्तवली जात आहे. (Gunaratna Sadavarte Detained by mumbai Police)

दरम्यान, घरा बाहेर पडताना आपली हत्या होऊ शकते असे म्हणत गृहमंत्री दिलीप वळसे पाटील यांच्या विरोधात माझ्या पत्नीने तक्रार दिलेली आहे. तर गुणरत्न सदावर्ते यांच्याविरोधात जी कलमं दाखल झाली आहेत त्यामध्ये नोटीस देण्याची गरज नसल्याचे पोलिसांनी म्हटले आहे. आज राष्ट्रवादीचे अध्यक्ष शरद पवार यांच्या मुंबईतील सिल्व्हर ओक या निवासस्थानी हजारो आंदोलक एसटी कर्मचाऱ्यांनी हल्लाबोल केला होता. त्यामुळे या ठिकाणचे वातावरण काहीसे चिंताजनक बनले होते.

शरद पवारांच्या घरावर हल्ल्याप्रकरणी १०७ जणांवर गुन्हा दाखल

आज दुपारी ज्येष्ठ नेते शरद पवार यांच्या मुंबईतील निवास स्थानावर एसटी कर्मचाऱ्यांनी हल्लाबोल करत बंगल्यावर चप्पल आणि दगडफेक केली. दरम्यान, या हल्ल्याप्रकरणी 107 जणांवर गुन्हा दाखल करण्यात आला आहे. याप्रकरणात 23 महिलांचाही सहभाग असल्याच समोर आलं आहे. दंगल परिस्थिती निर्माण करणे आणि षडयंत्र रचणे अशी विविध कलम लावून हा गुन्हा दाखल करण्यात आला आहे.