'ईडी'ला पूर्ण सहकार्य करणार : उन्मेष जोशी

मुंबई : अंमलबजावणी संचालनालयाची (ईडी) नोटीस मिळाल्याने मी आज ईडीच्या कार्यालयात हजर राहिलो होतो. चौकशीत मी ईडीला पूर्ण सहकार्य करणार असे माजी मुख्यमंत्री मनोहर जोशी यांचा मुलगा उन्मेष जोशी यांनी म्हटले आहे.

कोहिनूर प्रकरणात ईडीकडून रविवारी मनसे अध्यक्ष राज ठाकरे आणि उन्मेष जोशी नोटीस बजाविण्यात आली आहे. उन्मेष जोशींना आज तर राज ठाकरे यांनी येत्या गुरुवारी म्हणजे 22 ऑगस्टला चौकशीसाठी हजर राहण्याचे आदेश देण्यात आले आहेत. आज सकाळी उन्मेष जोशी चौकशीसाठी ईडीच्या कार्यालयात आले होते.

यावेळी उन्मेष जोशी म्हणाले, की ईडीची नोटीस मला आली आहे. या नोटीसमध्ये नेमका कोणत्याही प्रकरणाचा उल्लेख नाही. मी ईडीला पूर्णपणे सहकार्य करणार आहे. मी उद्योगपती आहे. कोहिनूर मिल व्यवहार बद्दल विचारत आहात ते 10 वर्षापूर्वीचं प्रकरण आहे. नोटीसमध्ये कोणतेही आरोप नाहीत, ईडीने फक्त भेटायला बोलावलं आहे. काय प्रश्न आहे ते बघून उत्तरे देऊ. नोटीसमध्ये कोणाकोणाची नावं आहेत हे माहित नाही, ईडीला माहित असेल. भेटायला बोलावलं आहे, काय आहे ते बघू. नोटीसमध्ये राज ठाकरे आणि माझं नाव आहे हे फक्त वर्तमानपत्रामध्ये कळलं, नोटीसमध्ये नावे नाहीत.