नवी मुंबई : शालेय स्नेहसंमेलन, नाटकासाठी भाडे तत्त्वावर कपडे घेण्याची पद्धत आता, लग्नसराईतही पाहायला मिळत आहे. समारंभात अल्पदरात शोभा वाढविण्यासाठी या भाड्याच्या कपड्यांना पसंती दिली जात आहे. अनेकांना जवळच्या नातेवाईकांच्या लग्न समारंभात डिझायनर ब्राईडल लेहंगा घालण्याची इच्छा असते, एम्ब्रॉयडरी असलेला नवाबी घालण्याची इच्छा असते, पण तो घेऊ शकत नाही. कारण हजारो-लाखो रुपये किमतीचा टॅग? पण, आता त्याची चिंता सोडून द्या. कारण, लग्नासह विविध कार्यक्रमांसाठी कपडे भाड्याने घेण्यास पसंती दिली जात असून, त्यास मोठ्या प्रमाणात प्रतिसादही मिळत आहे.
नवी मुंबईत जरी मोजक्‍या ठिकाणी भाड्याने कपडे मिळत असले, तरी अनेक जण थेट मुंबईतल्या भाड्याने कपडे देणाऱ्या व्यावसायिकांना गाठून महागडे कपडे कमी भाड्यात घेण्यास पसंती दर्शवत आहेत. पूर्वी केवळ शाळेचे स्नेहसंमेलन किंवा फॅन्सी ड्रेस स्पर्धेसाठी कपडे भाड्याने विकत घेण्याचा कल होता; परंतु आता छोट्या-मोठ्या कार्यक्रमांसाठी वेगवेगळे डिझायनर कपडे अगदी कमी किमतीमध्ये भाड्याने मिळतात. तसेच अनेकांच्या मते वीस ते तीस हजारांचा लेहंगा घेऊन, तो फक्त जवळच्या नात्यातील लग्न समारंभासाठी वापरता येईल. विशेष म्हणजे एकदा घातलेला लेहंगा पुन्हा घातला जात नसल्याने, त्याच्यासाठी हजारो रुपये खर्च पाण्यात गेल्यासारखे होते. त्यामुळे सध्या भाड्याच्या कपड्यांकडे अनेकांचा कल वाढू लागला आहे.
लग्नापूर्वीच्या छायाचित्रीकरणास पसंती
सिने कलाकारांची आलिशान लग्न, दूरचित्रवाहिनीच्या मालिकांमधील शाही विवाह सोहळ्यातील कपड्यांचा थाट सर्वांना भुरळ पाडतो. सध्या लग्नापूर्वीच्या छायाचित्रीकरणास पसंती दिली जात असल्याने, त्यासाठी किमान पाच ते सात प्रकारचे कपडे दोघा वधू-वरांना घ्यावे लागतात. लग्नासाठी इतरही खर्च असल्याने, अनेक जण भाड्याने कपडे घेतात. नवी मुंबईतही हा कल वाढत असल्याचे विक्रेता संतोष सिंग यांनी सांगितले.
बहिणीच्या लग्नात भाड्याने कपडे घेतले आहेत. २८ हजारांचे कपडे भाड्याने तीन हजारांना मिळाल्याने पैशांची बचतही झाली व राजेशाही थाटामध्ये मिरवताही आले. त्यामुळे माझी पसंती ही भाड्याच्या कपड्यांना आहे.
- इच्छिता भोईर, ग्राहक.
लग्न सोहळ्यासाठी कितीही खर्च केले तरी पैसे कमीच पडतात. मात्र, भाड्याने मिळणाऱ्या कपड्यांमुळे पंधरा हजारांची शेरवानी अवघ्या दीड हजार रुपयांत मिळाली.
- निखिल पाटील, ग्राहक.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.