Kalyan Loksabha: प्रशासनाचा भोंगळ कारभार, मतदार यादीत नाव नसल्याने मतदार हैराण

Dombivali News: मतदार यादीत नाव नसल्याने नागरिक आणि मतदार हैराण झाले आहॆत. सकाळपासून मतदान करण्या करता मतदार हा बाहेर पडला होता.

\मात्र 11चे ऊन डोक्यावर चढले तरी मतदार यादीत नावच सापडत नसल्याने नागरिक संतापले होते. प्रभागातील माजी नगरसेवकांकडे मतदारांनी तक्रार करण्यास सुरुवात करताच अनेक ठिकाणी माजी नगरसेवक, नगरसेविका बुथवर उतरून नाव शोधण्याचे काम करू लागले.

परंतु नाव सापडतच नसल्याने प्रशासनाचा हा सगळा भोंगळ कारभार असल्याने आज त्याचा फटका मतदारांना बसला असल्याचे मत माजी नगरसेवक शैलेश धात्रक यांनी व्यक्त केले.

डोंबिवली विधानसभा क्षेत्रात सकाळ पासूनच लोकसभा मतदान प्रक्रियेस सुरवात झाली होती. उन्हाचा त्रास नको म्हणून सकाळीच अनेकांनी घराबाहेर पडत मतदान केंद्र गाठण्यास सुरवात केली.

मतदान केंद्राच्या जवळील बुथवर जाऊन मतदार यादीत नागरिक आपलं नाव शोधू लागले. मात्र सकाळी 8 पासून ते 11 वाजत आले तरी नाव सापडत नसल्याने नागरिक हैराण झाले. नाव मिळत नसले तरी मतदार तेथेच घुटमळत होते. अखेर दुपार झाल्याने त्यांनी माघारी घरी जाणे पसंत केले.

घरातील काही लोकांची नाव आहेत तर काही लोकांची नाव नसल्याने नागरिक संतापले होते. दरम्यान नागरिकांना मदत करण्यासाठी माजी नगरसेवक बाहेर पडले असून भाजप नगरसेवक शैलेश धात्रक यांनी प्रशासनला दोषी धरले आहॆ.

धात्रक म्हणाले, प्रशासनाचा भोंगळ कारभार सुरू आहे. मुलाचं नाव आहे तर आईचं नाव नाही. यादी लोकांपर्यंत पोहोचलेली नाही. यादीमध्ये पण नाव नाही. ऑनलाइन पण सापडत नाही. घरामधल्या तीन जणांचे नाव आहे. तर बाकीच्यांचे नावच नाही. डोंबिवलीत 20 टक्के लोकांचे नावच मिळत नाहीये. नावाच्या अक्षरांत चुका केल्या गेल्या आहेत.