Mahavitaran : महावितरणकडे आता चॅट बॉटद्वारे तक्रार नोंदवता येणार

मुंबई - राज्यातील वीज ग्राहकांना आता खंडित वीज पुरवठा, आवाच्या सवा वीज बिल, बिल न मिळणे या समस्यांबाबत आपली तक्रार आता ऊर्जा चॅट बॉटद्वारे नोंदवता येणार आहे. त्याकरिता महावितरणने कृत्रिम बुद्धिमत्तेचा (एआय) वापर करून वीज ग्राहकांच्या संवादपर मदतीसाठी ‘ऊर्जा’ चॅट बॉट आपल्या संकेतस्थळावर आणि मोबाईल ॲपवर उपलब्ध करून देण्यात आले आहे. मराठी आणि इंग्रजी या दोन्ही भाषेत ग्राहकांना आपले प्रश्न विचारता येणार आहेत.

ऊर्जा चॅट बॉटमुंळे महावितरणच्या वीजसेवेसंदर्भात माहिती कुठे विचारावी आणि या सेवांचा घरबसल्या लाभ कसा घ्यावा हा प्रश्न आता संपुष्टात आला आहे. ग्राहकसेवांबाबत थेट प्रश्न विचारून विविध सेवांचा लाभ व तक्रारी नोंदविण्यासाठी ‘ऊर्जा’ नावाचे चॅट बॉट महावितरणच्या माहिती व तंत्रज्ञान विभागाने विकसीत केले आहे.

नवीन वीजजोडणी वा त्यासाठी केलेल्या अर्जाची सद्यस्थिती, वीजबिल भरणा किंवा वीजबिलाचा तपशील, जलद वीजबिल भरणा, मोबाईल क्रमांक व ई-मेलची नोंदणी इतर विविध शुल्कांचा ऑनलाइन भरणा, स्वतः मीटर वाचन व सबमिशन, गो-ग्रीन नोंदणी, वीज वापर व बिलाचे कॅलक्यूलेटर आदींबाबत वीजग्राहकांना ‘ऊर्जा’ चॅट बॉट थेट मदत करीत आहे.