मनसुखचा मृतदेह गाडीत असताना पोलिसच वाझेच्या गाडीला संरक्षण देत होते?

मनसुख हिरेन हत्या प्रकरणात API सचिन वाझे राष्ट्रीय तपास यंत्रणेच्या अटकेत असताना आणखी दोन पोलीस निरीक्षक एनआयएच्या रडारवर आहेत. मनसुख हिरेन हत्या प्रकरणात सहभागी असल्याचा त्यांच्यावरही आरोप आहे. चार मार्च रोजी  गायमुख चौपाटीपासून ठाणे खाडीपर्यंत पीआय रँकच्या एका अधिकाऱ्याची गाडी सचिन वाझे यांच्या गाडी सोबत होती. एकप्रकारे त्यांनी वाझेच्या गाडीला संरक्षण दिलं. पोलिसांच्या नाकाबंदीचा अडसर येऊ नये, यासाठी हे स्कॉटिंग दिल्याची शक्यता सूत्रांनी बोलून दाखवली आहे. 

पीआय रँकचा अधिकारी वाझे यांच्या गाडीसोबत असताना, त्या गाडीत मनसुख हिरेन असल्याचा एनआयएला संशय आहे. मनसुखचा मृतदेह फेकण्यासाठी ते जात असल्याचा संशय आहे. 

मुंबईत आज ५,८८८ नव्या कोरोनाबाधितांची नोंद, १२ रुग्णांचा  मृत्यू

एनआयएच्या माहितीनुसार,  पीआय रँकचा दुसरा  अधिकारी त्यावेळेस सीआययुच्या कार्यालयात होता. त्यावेळी वाझे यांचा मोबाईलही कार्यालयात होता. फोन आला तर वाझे व्यस्त आहेत, असे उत्तर देण्यास त्या दुसऱ्या पीआयला सांगण्यात आले होते. पण तेव्हा वाझे यांना एकही फोन आला नाही. एनआयएने त्या दिवशीचा सीडीआर काढला . मात्र यात फक्त वाजेंना ८ जाहिरातीचे मेसेज आले होते.

पोलिसांच्या समोर माहिममध्ये म्युझिकच्या तालावर जमावाने एकत्र साजरी केली रंगपंचमी

मनसुख हिरेनचा मृतदेह पाच मार्च रोजी मुंब्रा येथील खाडीत सापडला. या प्रकरणात आतापर्यंत सचिन वाझेचा सहभाग स्पष्ट करणारे अनेक पुरावे समोर आले आहेत. अजूनही पुरावे सापडत आहेत. राज्याच्या राजकारणात या प्रकरणाने एकच खळबळ उडवून दिली आहे. याच प्रकरणामुळे परमबीर सिंह यांची मुंबई पोलीस आयुक्त पदावरुन गच्छंती झाली. त्यानंतर त्यांनी राज्याचे गृहमंत्री अनिल देशमुख यांच्यावर अत्यंत गंभीर स्वरुपाचे आरोप केले. आक्रमक झालेल्या विरोधी पक्षाने अनिल देशमुख यांच्या राजीनाम्याची मागणी लावून धरली आहे.  

(संपादन - दीनानाथ परब)