राज्यातील लाखो कर्मचारी जाणार संपावर

चंद्रकांत खुताडे
बुधवार, 31 जुलै 2019

सरकारी कर्मचार्‍यांमध्ये कमालीचा असंतोष खदखदत आहे. त्यामुळे महाराष्ट्र राज्य जुनी पेन्शन हक्क संघटनेकडून जुनी पेन्शन योजना लागू करावी, या मागणीचे निवेदन तहसीलदार डहाणू यांचे मार्फत मुख्यमंत्री यांना देण्यात आले आहे.

डहाणू : राज्यातील कर्मचार्‍यांच्या बाबतीत सरकारने सरकारी-निमसरकारी, ज्येष्ठ-कनिष्ट असा कोणताही भेदभाव न करता सर्वांना एकच म्हणजे जुनी पेन्शन योजना पूर्ववत लागू करावी, यासाठी महाराष्ट्र राज्य जुनी पेन्शन हक्क संघटना गेल्या अनेक वर्षांपासून सनदशीर मार्गाने प्रयत्न करत आहे. तरीही या मागणीचा विचार हे निगरगट्ट सरकार गांभीर्याने करत नसून योग्य तो निर्णय घेत नाही.

परिणामी, सरकारी कर्मचार्‍यांमध्ये कमालीचा असंतोष खदखदत आहे. त्यामुळे महाराष्ट्र राज्य जुनी पेन्शन हक्क संघटनेकडून जुनी पेन्शन योजना लागू करावी, या मागणीचे निवेदन तहसीलदार डहाणू यांचे मार्फत मुख्यमंत्री यांना देण्यात आले आहे. या मागणीवर सरकारने तातडीने निर्णय न घेतल्यास येत्या 20 ऑगस्टला महाराष्ट्रातील सर्व विभागातील लाखो कर्मचारी संपावर जातील, असा इशारा महाराष्ट्र राज्य जुनी पेन्शन हक्क संघटनने निवेदनातून दिला आहे. 

यावेळी संघटनेचे राज्य उपाध्यक्ष शैलेश पाटील, पालघर जिल्हाध्यक्ष नितिन तिडोळे, तालुकाध्यक्ष व्यंकट लोकरे, उपाध्यक्ष सीताराम देशमुख, सचिव शाहू भारती, सहसचिव मधुकर चव्हाण, पदाधिकारी अनुरथ हाके, बी.डी.जाधव यांच्यासह अनेक कर्मचारी उपस्थित होते.

“1 नोव्हेंबर 2005 नंतर सरकारी सेवेत दाखल कर्मचार्‍यांच्या पगारावर सरकारी आदेशाने दरोडा टाकला जात आहे. प्रत्येक कर्मचार्‍यांचे डीसीपीएस या गोंडस नावाखाली दहा टक्के मासिक वेतन कापून घेतले जाते. मात्र, याचा साधा हिशोबही कुणाकडे मिळत नाही. ही बाब अतिशय गंभीर असून सरकारने हा अन्याय लवकरात लवकर दूर करावा.” 
 - शाहू संभाजी भारती (सचिव, पेन्शन हक्क संघटन शाखा डहाणू)


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Millions of employees in the state will go on strike