केईएममधील 'तो' बेपत्ता रुग्ण अखेर सापडला; 15 दिवसांनी लागला तपास.. 

मुंबई : केईएम रुग्णालयातून अचानक बेपत्ता झालेले 75 वर्षीय कोरोनाबाधित रुग्णाचा अखेर 15 दिवसांनी तपास लागला आहे. या रुग्णाचा मृतदेह रुग्णालयाच्या शवागृहात सापडल्यानंतर रुग्णालय प्रशासनाने त्यांच्या कुटुंबियांना कळवले असून नातेवाईकांनी मृतदेह ओळखून तो ताब्यातही घेतला आहे.

केईएम रुग्णालयात उपचार घेणारे रुग्ण सुधाकर खाडे हे अचानक बेपत्ता झाल्याने त्यांच्या नातेवाईकांनी पोलिस ठाण्यात तक्रार दाखल केली होती. या प्रकरणी भाजप नेते किरीट सोमय्या यांनी वरिष्ठ पोलिस अधिकाऱ्यांची भेट घेत खाडे कुटुंबीयांना मदत केली होती. यानंतर शोधाशोध झाली आणि अखेर सुधाकर खाडे यांचा मृतदेह सापडला.

हेही वाचा: लोकहो पावसाळा आलाय, जाणून घ्या कुठल्या पाण्यात किती वेळ राहतो कोरोना विषाणू...

सुधाकर खाडे यांना थंडी, ताप आणि श्वासोच्छवास घेण्यास त्रास होऊ लागल्याने 14 मे रोजी त्यांना केईएम रुग्णालयात दाखल करण्यात आले होते. त्यानंतर 15 मे रोजी खाडे यांच्या कोरोना तपासणीचा अहवाल पॉझिटिव्ह आल्यानंतर त्यांना अतिदक्षता विभागात ठेवण्यात आले. आणि त्यांच्या पत्नी आणि बहिणीला पालिकेने भोईवाडा येथे क्वारंटाईन केले.

या प्रकरणी सुधाकर खाडे यांच्या कुटुंबीयांनी भाजप नेते किरीट सोमैय्या यांची भेट घेऊन त्यांना घडलेला प्रकार सांगितला. खाडे यांच्या जावयाने 25 मे रोजी भोईवाडा पोलिसांत तक्रार दाखल केली. किरीट सोमय्या यांनी पुरुषोत्तम खाडे यांच्यासोबत जावून संबंधित विभागाच्या पोलिस उपायुक्तांची भेट घेऊन कारवाईची मागणी केली होती. पालिका रुग्णालय प्रशासनाच्या हलगर्जीपणामुळे असे प्रकार घडत असल्याचा आरोप सोमैय्या यांनी केला होता.

हेही वाचा: निसर्ग चक्रीवादळ: मुक्या प्राण्यांना जपा, त्यांना आसरा द्या; प्राणीमित्रांचं आवाहन 

तुमचा पेशंट खाटेवर नाही:

दरम्यान, 19 मे रोजी पहाटे 5 वाजता अचानक केईएम रुग्णालयातून आलेल्या दूरध्वनीवरून “तुमचा पेशंट खाटेवर नाही. आम्ही तपास करतो दुसऱ्या कुठल्या वॉर्डमध्ये आहे का? आणि तुम्हाला कळवतो”, असे सांगण्यात आले. मात्र रुग्णालयात सर्वत्र शोधल्यानंतर ही बेपत्ता खाडे यांचा ठावठिकाणा लागला नाही.

missing patient in KEM finally found in hospital read full story