प्रताप सरनाईक बेपत्ता असल्याची सोमय्यांची पोलिसात तक्रार

ठाणे: ठाण्यातील ओवळा-माजीवाडा मतदारसंघाचे आमदार प्रताप सरनाईक (Pratap Sarnaik) मागच्या काही दिवसांपासून गायब असल्याची चर्चा आहे. या पार्श्वभूमीवर आज भारतीय जनता पार्टीने ठाणे वर्तकनगरमध्ये आंदोलन केले. माजी खासदार किरीट सोमय्या, (Kirit Somaiya) आमदार निरंजन डावखरे आणि ५० रहिवाशांनी मानवी साखळी करुन आंदोलन केले. (Missing Pratap Sarnaik Complaint lodged at Vartak Nagar Police Station Thane by Kirit Somaiya)

भाजपा कार्यकर्त्यांनी यावेळी 'MR. India' लिहिलेले बॅनर हाती धरले होते. प्रताप सरनाईकांना 'MR. India' ठरवून त्यांच्याविरोधात घोषणाबाजी करण्यात आली. मागच्या १०० दिवसांपासून प्रताप सरनाईक बेपत्ता असल्याचा भाजपाचा आरोप आहे. त्याशिवाय किरीट सोमय्या यांनी वर्तक नगर पोलीस ठाण्यात प्रताप सरनाईक बेपत्ता असल्याची तक्रार नोंदवली.

"प्रताप सरनाईक गायब असल्याचं आम्हाला सांगण्यात आलय. ते मातोश्रीमध्ये लपलेत असं बोलल जातय. म्हणून वर्तक नगरच्या मतदारांसह गायब आमदारांची तक्रार नोंदवण्यासाठी इथे आलोय. प्रताप सरनाईक मातोश्रीत असतील, तर त्यांना शोधून काढा" अशी मागणी किरीट सोमय्या यांनी केली.