शिवसेना भवनासमोर मनसेचा भोंगा; रामनवमीला नाकावर टिच्चून लावली हनुमान चालिसा

मुंबई: महाराष्ट्र नवनिर्माण सेना हा पक्ष अलिकडे ऍक्टीव्ह झालेला दिसून येतोय. गुढीपाडव्यानिमित्ताने शिवाजी पार्कवर राज ठाकरेंनी केलेल्या भाषणानंतर सर्व मनसैनिकांना पुन्हा एकदा तरतरी आली आल्याचं दिसून येतंय. राज ठाकरेंनी केलेलं 'मशीदीवरील भोंगे हटवा, अन्यथा हनुमान चालिसा लावू', हे विधान चांगलंच वादग्रस्त ठरलं आणि त्याबरहुकूम वागणाऱ्या मनसैनिकांनी ठिकठिकाणी भोंगे लावायला सुरुवातही केली. त्याच साऱ्या पार्श्वभूमीवर आता महाराष्ट्र नवनिर्माण सेनेनं आता शिवसेना पक्षाचं मुख्यालय असलेल्या 'शिवसेना भवना'बाहेर लाऊडस्पीकर लावले आहेत. या लाऊडस्पीकरवर हनुमान चालिसा लावण्यात आली आहे. आज रामनवमीचं औचित्य साधत मनसेनं शिवसेनेला डिवचण्याचा प्रयत्न केला आहे. (Raj Thackeray)

आता मनसेचे हे लाऊडस्पीकर जप्त करत मनसेच्या कार्यकर्त्यांना पोलिसांनी ताब्यात घेतलं आहे.

मनसैनिकांनी राबवलेल्या या उपक्रमाला प्रशासनाने ठिकठिकाणी हरकत घेतल्याचंही दिसून आलं. काही ठिकाणी त्यांचं सामान ताब्यात घेतलं तर काही ठिकाणी कार्यकर्त्यांनाही ताब्यात घेतल्याचं दिसून आलं. राज ठाकरेंनी केलेलं हे वक्तव्य मनसैनिकांनी शिरसावंद्य मानत उपक्रम राबवला असला तरी पुण्यात मात्र, यावरुन चांगलंच राजकारण तापल्याचं दिसून आलं. पुण्यातील मनसेचे शहराध्यक्ष वसंत मोरेंनी या निर्णयाविरोधात भूमिका घेत मी असं करणार नसल्याचं सांगितलं. त्यावरुन त्यांना आपलं पदही गमवावं लागल्याचं दिसून आलं. मात्र, ते आपल्या मुस्लिम कार्यकर्त्यांसह आपल्या निर्णयावर ठाम राहिले आहेत. (Raj Thackeray)