Palghar Crime: मायलेकी झोपलेल्या असताना अज्ञाताने केला प्राणघातक हल्ला!

मोखाडा तालुक्यातील  बादलपाडा येथील यशोदा पांडुरंग झुगरे ( 48 ) आई , गुलाब पांडुरंग झुगरे ( 24 ) मुलगी या दोघी घरात झोपलेल्या असतांना, अज्ञात हल्लेखोराने मागच्या बाजूने खिडकीतून प्रवेश करत मायलेकींवर टोकदार शस्राने प्राणघातक हल्ला करुन पळ काढला आहे.या घटनेबाबत मोखाडा पोलिस ठाण्यात अज्ञात हल्लेखोरा विरोधात गुन्हा नोंदविण्यात आला आहे.   

  मोखाडा पोलिसांनी दिलेल्या माहितीनुसार यशोदा आणि गुलाब घरात झोपलेल्या असतांना,  15  फेब्रुवारी ला गुरूवारी पहाटे  4 : 30 च्या सुमारास मागील बाजूच्या खिडकीतून अज्ञात हल्लेखोराने प्रवेश केला. बाहेर हॉलमध्ये झोपलेल्या मायलेकी खिडकीच्या आवाजाने उठल्या आणि त्यांनी आरडाओरडा केला.

त्यावेळी त्या अज्ञात इसमाने टोकदार हत्याराने यशोदा झुगरे यांच्या पाठीत वार केला. आईला सोडवायला गेलेल्या मुलगी गुलाब ला देखील या अज्ञात इसमाने पाठीवर टोकदार शस्राने वार करुन जखमी केले आहे.

या दोघींवर खोडाळ्यातील खाजगी दवाखान्यात उपचार करण्यात आले आहेत. जखमी मायलेकींच्या तक्रारी वरून टोकदार शस्राने हल्ला करून जखमी केल्याप्रकरणी, अज्ञाता विरोधात मोखाडा पोलीस ठाण्यात गुन्हा दाखल करण्यात आला आहे. घटनेचा अधिक तपास सहाय्यक पोलीस निरीक्षक प्रदिप गिते करत आहेत. 

         मोखाडा तालुक्याला कोणतीही गुन्हेगारी पार्श्वभूमी नाही.मात्र प्रेतांची विल्हेवाट लावणे, हल्ला करणे असे प्रकार तालुक्यात या पंधरवाड्यात लागोपाठ घडत असल्याने गुन्हेगारी जगापासून कोसो दुर असलेल्या तालुक्यातील निष्पाप नागरीक धास्तावले आहेत.