Mumbai News : पोहायला गेली अन् विपरीत घडलं; मुंबईच्या मालाड बीचवर 3 मुले बुडाली

मुंबई : मुंबईच्या मालाड मार्व समुद्रकिनाऱ्यावर फिरण्यासाठी आलेल्या बारा ते पंधरा वर्षे वयोगटातील पाच मुले समुद्रात बुडाल्याची धक्कादायक घटना घडली आहे. बुडालेल्या पाच मुलांपैकी दोघांना वाचवण्यात यश आले असून तीन मुले अद्यापही बेपत्ता आहेत. त्यांचा शोध घेण्याचा काम सुरू आहे.

मिळालेल्या माहितीनुसार, मालवणी परिसरातील ही पाच मुले मालाड मारवे समुद्रकिनाऱ्यावर फिरण्यासाठी गेली असता यांनी आंघोळ करण्यासाठी समुद्रात उड्या घेतल्या मात्र पाण्याचा अंदाज न आल्याने ही पाचही मुले बुडू लागली. समुद्रकिनाऱ्यापासून साधारणपणे अर्धा किलोमीटर आत खोल समुद्रात ही मुले बुडाली. यातील दोन जणांना वाचवण्यात यश आले आहे.

कृष्णा जितेंद्र हरिजन (१६ वर्षे ) आणि अंकुश भारत शिवरे (१३ वर्ष ) या दोन मुलांना वाचवण्यात यश आले असून शुभम राजकुमार जयस्वाल (१२ वर्ष) निखिल साजिद कायमकूर (१३ वर्ष) अजय जितेंद्र हरिजन (१२ वर्ष) ही तीन मुले बेपत्ता असून कोस्टगार्डचे जवान, अग्निशमन दलाचे जवान, महापालिकेचे जीव रक्षक आणि कोस्टगार्डचे जवान समुद्रात बेपत्ता झालेल्या मुलांचा शोध घेत आहेत.