Mumbai : ट्विटवरील 'ब्लु टिक' निघून गेली, नेत्यांचे पुढचे पाऊल काय ?

मुंबई - राज्यातील अनेक दिग्गज नेत्यांपासून ते बॉलिवूडचे कलाकार आणि खेळाडू यांचे ट्विटवरील ब्लु टिक निघून गेले आहे. व्हेरिफाईड खात्यांसाठी विविध निकष ट्विटरने याआधी वापरले होते. पण आता ट्वीटरचे नवे प्रमुख एलन मस्क यांनी या ब्लू टिकसाठी सबस्क्रिप्शन घ्यावे लागणार म्हणजेच पैसे मोजावे लागणार असल्याची घोषणा केल्याने अनेक महत्त्वाच्या व्यक्तींची ब्लू टिक निघाली आहे.

राज्याचे मुख्यमंत्री एकनाथ शिंदे, सांस्कृतिक कार्य मंत्री सुधीर मुनगंटीवार,विरोधी पक्षनेते अजित पवार, राज्य महिला आयोगाच्या अध्यक्षा रुपाली चाकणकर, काँग्रेस नेते बाळासाहेब थोरात, अशोक चव्हाण, भाजप आमदार नितेश राणे, भाजप नेत्या चित्रा वाघ यांच्यासह अनेक दिग्गज नेत्यांच्या ट्विटर अकाऊंटवरून ब्लु टिक निघून गेले आहे.

तर अमिताभ बच्चन, सलमान खान या अभिनेत्यांच्या खात्यावरून ही व्हेरिफाईडचे निशाण काढून घेण्यात आले आहे. मास्टर ब्लास्टर सचिन तेंडुलकर यांच्या खात्याचेही ब्ल्यू टिक निघून गेले आहे.

राज्य महिला आयोगाच्या अध्यक्षा रुपाली चाकणकर यांच्या ट्विटर हँडलला व्हेरिफाईड ब्लू टिक मिळाली होती. सकाळने त्यांच्याशी संपर्क साधल्यानंतर ही ब्लू टिक काढल्याचे त्यांच्या निदर्शनास आले. माझ्या टिमशी संपर्क साधून ब्लू टिक परत मिळवण्यासंदर्भात प्रयत्न करणार असल्याचे त्यांनी सकाळशी बोलताना सांगितले.

माझे ट्विटर व्हेरिफाईड होते. ब्लु टिक परत मिळविण्यासंदर्भात माझी टीम काम करते आहे. लवकरच पुन्हा अकाऊंट व्हेरिफाईड होईल.

- नितेश राणे