Mumbai : कारागृहात बंद्यांना विवस्त्र करणे निंदनीय!

मुंबई : कारागृहात बंदिवानाची झडती घेताना त्यांना विवस्त्र करणे म्हणजे मूलभूत खासगी अधिकाराचा भंग आहे, असे खडे बोल विशेष न्यायालयाने कारागृह प्रशासनाला सुनावले. अशा प्रकारचे वर्तन अत्यंत असंसदीय आणि निंदनीय आहे, अशा शब्दांत न्यायालयाने नाराजी व्यक्त केली आहे.

आरोपी शेख याने विशेष न्यायालयात केलेल्या याचिकेवर विशेष मोक्का न्या. बी. डी. शेळके यांनी निकाल दिला आहे.शेख बॉम्बस्फोट प्रकरणात आरोपी आहे. त्याच्यासह अन्य काही बंद्यांनीही अशा प्रकारची तक्रार न्यायालयात केली असून न्यायालयाने वेळोवेळी प्रशासनाला ताकीद दिली आहे.

न्यायालयीन सुनावणीसाठी शेखला कारागृहाबाहेर नेण्यात आल्यानंतर परतल्यावर नेहमी सर्व कर्मचारी आणि कैद्यांसमोर त्याला विवस्त्र करून झडती घेतली जाते, असे त्याने याचिकेत नमूद केले आहे. अत्यंत घाणेरड्या शब्दांत झडती घेताना कर्मचारी हिणवतात आणि अपमानित करतात, अशी तक्रारही त्याने केली आहे.

सर्व प्रकारावर न्यायालयाने निकालपत्रात तीव्र नाराजी व्यक्त केली आहे. मुंबई मध्यवर्ती कारागृह प्रशासनाने शेखच्या दाव्यांना विरोध करत आरोप फेटाळून लावले. मात्र याचिकादारासह अन्य अनेक बंद्यांनीही अशी तक्रार केल्याचे न्यायालयाने निकालपत्रात म्हटले आहे. अशी कृती अपमानास्पद असून बंद्यांच्या खासगी जगण्याच्या अधिकारावर आक्रमण करणारी आहे, असे निरीक्षण न्यायालयाने नोंदवले आहे.

तपासणीसाठी स्कॅनर वापरा

कारागृह कर्मचाऱ्यांनी यापुढे स्कॅनर आणि अन्य तपास साधने बंद्यांची तपासणी करताना वापरावीत, असे निर्देश न्यायालयाने कारागृह अधीक्षकांना दिले आहेत. जर अशी साधने उपलब्ध नसतील, तर कपडे न उतरवता सभ्यपणे आणि असभ्य भाषा न वापरता तपासणी करावी, असेही आदेश कर्मचारी आणि अधिकाऱ्यांना दिले आहेत.