Mumbai Crime : आठवडाभरापूर्वी बाहेर आला, पुन्हा घडली जेलची वारी

Mumbai Crime : चोरीची शिक्षा भोगून आठवडाभरापूर्वी जेलमधून तो बाहेर आला. बाहेर येताच त्याने पुन्हा परिसरात रेकी करत बंद घरावर डल्ला मारुन घरातील सामानाची चोरी करण्याचा मार्ग पत्करला.

सावरकर रोडवरील एका घरफोडीच्या गुन्ह्यात पोलिस तपास करत असताना पोलिसांच्या जाळ्यात तो अडकला आणि डोंबिवली पोलिसांनी त्याला बेड्या ठोकत पुन्हा जेलची वारी घडवली आहे. सुरज उर्फ गोल्डी पटिया असे अटक केलेल्या आरोपीचे नाव आहे. जुने कपडे खरेदी विक्रीचा व्यवसाय सुरज करायचा त्यातूनच तो परिसरातील घरांची रेकी करत असल्याची बाब पोलिस तपासात उघड झाली आहे.

डोंबिवली पूर्वेतील सावरकर रोडवरील शामराव विठ्ठल बॅंकेजवळील एका घरात चोरीची घटना घडली होती. घरातील सोने, चांदिचे दागिने व रोख रक्कम असा एकूण 52 हजार रुपये किंमतीचा मुद्देमाल चोरीला गेला होता.

याप्रकरणी रामनगर पोलिस ठाण्यात तक्रार दाखल करण्यात आली होती. दाखल तक्रारीनुसार पोलिसांनी गुन्हा दाखल करत तपास सुरु केला होता. डोंबिवलीचे सहाय्यक पोलिस आयुक्त सुनील कुराडे यांच्या मार्गदर्शनाखाली वरिष्ठ पोलिस निरिक्षक नितीन गीते यांचे पथक पोलीस निरिक्षक बळवंत भराडे, पोलिस हवालदार सचिन भालेराव, लोखंडे, कोळेकर, सरनाईक, राठोड यांच्या पथकाने तांत्रिक बाबी व गुप्त बातमीदार यांमार्फत शोध सुरु केला.

डोंबिवली राहणाऱ्या सूरज याने ही चोरी केल्याची बाब पुढे आल्यानंतर पोलिसांनी त्याला ताब्यात घेत विचारपूस केली असता त्याने गुन्ह्याची कबुली दिली. सूरज याच्याकडून दिड लाखाचा चोरीचा मुद्देमाल पोलिसांनी हस्तगत केला आहे. सुरज हा सराईत गुन्हेगार असून त्याच्यावर यापूर्वी तीन ते चार चोरीचे गुन्हे दाखल आहेत.

आठवडाभरा पूर्वी तो चोरीची शिक्षा भोगून जेलमधून बाहेर आला होता. बाहेर येताच त्याने पुन्हा चोरीचा मार्ग स्विकारत चोरी केली. आठ दिवसांच्या कालावधीत त्याने आणखी काही चोऱ्या केल्या आहेत का? याचा पोलिस अधिक तपास करत आहेत.