Mumbai : कल्याण डोंबिवली महानगरपालिका क्षेत्रात 'आपला दवाखाना';महाराष्ट्र दिनी होणार शुभारंभ

डोंबिवली - राज्य सरकारने मुंबईसह राज्यभरात 'बाळासाहेब ठाकरे आपला दवाखाना' ही योजना सुरू केली. मुंबईनंतर आता ठाणे जिल्ह्यातील कल्याण डोंबिवली महापालिकेत आपला दवाखाना महाराष्ट्र दिनी सुरू करण्यात येणार आहे.

तसेच केडीएमसी हद्दीत 9 मे ला 4 नविन आरोग्यवर्धीनी केंद्रे देखील सुरु होणार आहेत. यामुळे शहरातील नागरिकांना मोफत उपचार व विविध आरोग्य सुविधा या रुग्णालयांमध्ये उपलब्ध होणार आहेत. मुख्यमंत्री एकनाथ शिंदे यांनी राज्यभर या दवाखान्यांची व्याप्ती वाढविण्याचे निश्चित केले आहे. त्यानुसार केडीएमसी हद्दीत देखील हा उपक्रम सुरू होणार आहे.

राज्य शासनाच्या आरोग्य विभागाच्या वतीने मुंबईतील विविध प्रभागांमध्ये यशस्वीपणे राबविण्यात आलेल्या

'हिंदुहृदयसम्राट बाळासाहेब ठाकरे आपला दवाखाना' ठाणे जिल्हयातील कल्याण डोंबिवली महानगर पालिकेत सुरु होणार आहे. महाराष्ट्र दिनी 1 मे रोजी सकाळी 10 वाजता मुख्यमंत्री एकनाथ शिंदे यांच्या हस्ते ऑनलाईन पध्दतीने आपला दवाखान्याचे लोकार्पण करण्यात येणार

असल्याची माहिती केडीएमसीच्या मुख्य वैद्यकीय आरोग्य अधिकारी डॉ. अश्विनी पाटील यांनी दिली. कल्याण पश्चिमेतील तळमजला, तारांगण बिल्डींग, वायले नगर, येथे 'हिंदुहृदयसम्राट बाळासाहेब ठाकरे आपला दवाखाना' सुरु करण्यात येणार आहे. सदर दवाखान्यामधे बाहयरुग्ण विभाग असणार आहे. तसेच असांसर्गिक रोग नियंत्रण कार्यक्रम, लसीकरण, माताबाल संगोपन कार्यक्रम राबविण्यात येणार आहे. तसेच बाह्य

संस्थेद्वारे रक्त व लघवीच्या तपासण्या करण्यात येणार आहे. या दवाखान्यामुळे जवळच्या परिसरातील नागरिकांना चांगली आरोग्य सुविधा उपलब्ध होणार असल्याचे उपआयुक्त डॉ. सुधाकर जगताप यांनी सांगितले.