दूध आणायला गेल्याने रफी बचावले पण संपूर्ण कुटुंब संपलं

मुंबई: मुंबईतील मालवणी भागात (mumbai malvani area) काल झालेल्या मुसळधार पावसामुळे चार मजली इमारत कोसळली. या भीषण दुर्घटनेमध्ये तब्बल ११ जणांना आपला प्राण गमवावा लागला आहे. याच दुर्घटनेमध्ये मोहम्मद रफी यांचं संपूर्ण कुटुंबच संपलं आहे. (mumbai malvani area building collapse except mohammed rafi all family members died)

मुंबईत पावसाळ्यात इमारत कोसळण्याच्या घटना काही नवीन नाहीत. काल रात्री देखील मुंबईतील मालाड मालवणीत पहिल्याच पावसात इमारत कोसळण्याची घटना घडली. या दुर्घटनेत या इमारतीत राहणारे ११ जण दगावले . तर १८ जण जखमी झालेत. या इमारतीत एका घरात राहणारे मोहमद रफी काल रात्री ही दुर्घटना घडली तेव्हा दूध आणण्यासाठी बाहेर पडले, पण घरी आले तेव्हा त्यांचं संपूर्ण कुटुंब ढिगाऱ्याखाली अडकल असल्याचं त्यांच्या निदर्शनास आलं.

धक्कादायक बाब म्हणजे या अपघातामध्ये मोहम्मद रफींच्या ६ मुलांसह कुटुंबातील ९ जणांचा मृत्यू झाला आहे. मोहम्मद रफी यांच्या कुटुंबात सहा मुले व चार वयस्कर लोक होते. नेहमीप्रमाणे दुध आणण्यासाठी ते गेले पण परत आल्यानंतर त्यांच्या काळाजाचा ठोका चुकला होता. त्यांचं हसतं खेळतं कुटुंब या दुर्घटनेत पूर्णपणे संपलं होतं.

या आधी देखील या परिसरात अशा घटना घडल्या आहेत. कारण ही संपूर्ण जागा जिल्हाधिकारी अखत्यारीतील आहे. त्यामुळे इथे अनधिकृत बांधकामे अनेक झाली आहेत. चिंचोळे रस्ते आहेत. दुर्घटना घडल्यानंतर अग्निशमन दलाला बचाव कार्य करताना अनेक अडचणींना सामोरं जावं लागलं होतं. बचाव कार्यात १८ जखमीअवस्थेत सापडले, तर ११ जणांचे मृतदेह आढळले .