मुंबईत लॉकडाउन होणार? आदित्य ठाकरेंनी केलं सूचक वक्तव्य

मुंबई :- कोरोनावरील लस घेण्याबाबत सर्वत्र जनजागृती केली जात असतानाच गुरूवारी महाराष्ट्राचे मुख्यमंत्री उद्धव ठाकरे यांनी लस घेतली. मुंबईच्या जे जे रूग्णालयात त्यांनी ख्यातनाम डॉक्टर तात्याराव लहाने यांच्या उपस्थितीत कोव्हॅक्सिन ही लस टोचून घेतली. करोनाचा प्रादुर्भाव पुन्हा एकदा वाढत असताना मुख्यमंत्र्यांनी लस घेत अनेक प्रश्नांना पूर्णविराम दिला. यावेळी त्यांच्यासोबत राज्याचे मंत्री आदित्य ठाकरे आणि पत्नी रश्मी ठाकरेदेखील होत्या. यावेळी लॉकडाउनच्या प्रश्नावर पर्यावरण मंत्री आदित्य ठाकरे यांनी उत्तर दिलं.

करोनाचा धोका लक्षात घेता काही भागांमध्ये पुन्हा लॉकडाउन करायला लागेल का? असा सवाल आदित्य ठाकरेंना प्रसारमाध्यमांनी विचारला. त्यावेळी बोलताना, "तुम्ही आणि आम्ही, सारेच सध्या मास्क घालतोय. जर प्रत्येक नागरिकांनी आपापली काळजी घेतली आणि मास्कचा वापर केला तर कोरोनाचा प्रादुर्भाव कमी होईल आणि कोरोना प्रसाराला आळा बसेल", असं उत्तर त्यांनी दिलं. पण, मुंबईतील पूर्णत: किंवा अंशत: लॉकडाउन केला जाणार का? या प्रश्नाचं उत्तर देणं मात्र त्यांनी टाळलं.

हे वाचा - मुख्यमंत्री उद्धव ठाकरे यांनी घेतला कोविड लसीचा पहिला डोस

मुख्यमंत्री उद्धव ठाकरे यांनी कोरोना लस घेतली. त्यावरही आदित्य यांनी मत व्यक्त केलं. "लसीबाबत अनेक तर्कवितर्क लढवले जात असताना स्वत: मुख्यमंत्र्यांनी लस टोचून घेतली आहे. मला असं वाटतं की त्यांनी एक उदाहरण जनतेसमोर ठेवलं आहे. त्यामुळे जे जे लोक लस टोचून घेण्याच्या निकषात आहेत त्यां साऱ्यांनीच लस घ्यावी आणि कोरोनाला आळा घालण्यास मदत करावी. जे लस घेतील त्यांना नक्कीच कोरोनापासून सुरक्षा मिळेल त्यामुळे जास्तीत जास्त लोकांनी कोरोनाची लस घेतली पाहिजे", असं आवाहन पर्यावरण मंत्री आदित्य ठाकरे यांनी केलं.

मुंबईच्या इतर बातम्यांसाठी क्लिक करा

दरम्यान, मुख्यमंत्री उद्धव ठाकरे यांनी मात्र राज्यातील जनतेला इशारा दिला. जनतेने कोरोनाचा प्रसार टाळण्यासाठी सांगितलेल्या नियमांचे पालन करावे. जर काही लोक मास्कचा वापर करताना दिसले नाहीत किंवा ठराविक ठिकाणी गर्दी दिसली, तर मात्र कठोर निर्णय घ्यावे लागतील, असा इशारा उद्धव ठाकरे यांनी दिला.