पावसाची उसंत; लोकल सेवा सुरळीत, रेल्वे प्रशासन 'अलर्ट मोड'वर

• मध्य रेल्वे आणि मुंबई पालिका यांच्या पावसावरून रंगलं होतं 'ट्विटरवॉर'

मुंबई: सोमवारी मध्यरात्रीपासून सुरू झालेल्या पावसाने (Mumbai Rains) मंगळवार मुंबई आणि उपनगरांना झोडपून काढलं. मुंबई, ठाणे, कल्याण डोंबिवली, वसई, विरार, पालघर, पनवेल, नवी मुंबई या सर्व भागांमध्ये मुसळधार पाऊस (Heavy Rainfall in Mumbai) झाला. परिणामी, मुंबईची जीवनवाहिनी असलेल्या मुंबई लोकल (Mumbai Local Trains) मंगळवारी बराच काळासाठी ठप्प होती. चाकरमान्यांच्या ऑफिसला जाण्याच्या आणि येण्याच्या वेळेत लोकलसेवा (Local Services) बंद होती. रूळांवरून पाणी हटवल्यावर रात्री उशीरा ट्रेन्स पुन्हा सुरू झाल्या. मात्र बुधवारी सकाळपासूनच पावसाने उसंत घेतली आहे. तशातच, दुपारच्या वेळी समुद्राला भरतीचा (High Tide) असल्याने रेल्वे प्रशासन अलर्ट मोडवर आहे. (Mumbai Rains Local Trains Running well railways management on alert mode)

सध्याच्या घडीला पावसाने उसंत घेतली आहे. लोकल रेल्वे सेवा सर्व मार्गावर सुरळीत सुरू आहे. दुपारी १२ वाजून १७ मिनिटांनी समुद्राला भरती असून त्यावेळी ४.२६ मीटर उंचीच्या लाटा उसळण्याचा अंदाज व्यक्त करण्यात आला आहे. अशा परिस्थितीत रेल्वे प्रशासन अलर्ट मोडवर असून कुठेही पाणी साठलं तर ते यंत्राने उपसता येईल अशी उपाययोजना करण्यात आली आहे. सर्व घडामोडींवर रेल्वे प्रशासनाचे बारीक लक्ष आहे, अशी माहिती मध्ये रेल्वेचे जनसंपर्क अधिकारी शिवाजी सुतार यांनी दिली.