Mumbai : कपिल पाटील यांच्यावर गुन्हे दाखल व्हावे; सैनिक व शिक्षकांचे आझाद मैदानात शुक्रवारी धरणे आंदोलन

मुंबई - मुंबईचे शिक्षक आमदार कपिल पाटील आणि महामुंबई शिक्षणसंस्था संघटना व इतरांनी संगनमत व षडयंत्र रचून आपल्याविरुद्ध सातत्याने खोटे आरोप करत असल्याचा आरोप शिक्षक लोकशाही आघाडीचे अध्यक्ष जनार्दन जंगले यांनी केला आहे.

यामुळे आपली बदनामी झाली असून कपिल पाटील यांच्यावर गुन्हे दाखल व्हावे आणि शासनाने सर्व स्तरातील भ्रष्टाचार रोखावा म्हणून सैनिक व शिक्षकांनी आझाद मैदानात शुक्रवारी धरणे आंदोलन केले.

मुंबईचे शिक्षक आमदार कपिल पाटील व बलाढ्य महामुंबई शिक्षण संस्था संघटना चे पदाधिकाऱ्यांनी परस्परांशी संगनमत व षडयंत्र रचून शिक्षक लोकशाही आघाडी (टिडीएफ) मुंबईचे अध्यक्ष जनार्दन जंगले यांचेविरुध्द शिक्षणक्षेत्रात भीती पसरवणे,

खून करणे, खंडणीखोरी करणे, असे अनेक खोटे आरोप गेली चार वर्षापासून सातत्याने राज्यपाल, उच्चन्यायालय, केन्द्र शासनाचे विविध विभाग, मुख्यमंत्री, गृहमंत्री, विधी व न्याय मंत्री, प्रधान सचिव विधी व न्याय विभाग, शिक्षण आयुक्त, उच्च शिक्षण विभाग, पोलीस आयुक्त, धर्मदाय आयुक्त. मुंबईतील अनेक पोलीस ठाणे यांचेकडे खोटे आरोप करीत आहे.

जंगले यांनी शिक्षण क्षेत्रात बोकाळलेल्या भ्रष्टाचाराविरुद्ध शासनाकडे तक्रारी केल्यावर शिक्षणखात्याने कायदेशिर चौकशी नेमली, त्या चौकशीच्या अहवालानुसार सर्व संबंधित अधिकाऱ्यांवर संस्थांवर कारवाईचे आदेश शिक्षण आयुक्त यांनी दिले आहेत.

त्यामुळे सर्व भ्रष्ट आमदार कपिल पाटील यांचे नेतृत्वात एकत्र येऊन टिडीएफ संघटनेला व अध्यक्ष जनार्दन जंगले यांचे विरुद्ध खोट्या तक्रारी करून बदनाम व हैराण केल्याचा आरोप जंगले यांनी केला आहे.

सुमारे गेल्या १८ वर्षांपासून कपिल पाटील शासनाचे कोट्यावधी निधी लाटत आहे. आणि दुसरीकडे माझ्यावर भ्रष्टाचाराचे खोटे आरोप करत आहे. पाटील यांनी जिथे जिथे तक्रारी केल्यात त्याठिकाणी काहीही तथ्य निघाले नाही. त्यामुळे खोटे आरोप करणाऱ्या पाटीलवर गुन्हे दाखल करावे, त्यांची आमदारकी रद्द करण्यात यावी.

- जनार्दन जंगले,अध्यक्ष, शिक्षक लोकशाही आघाडी (टिडीएफ)