'तुम्हाला निमंत्रण नाही', काँग्रेस नेत्यांच्या बैठकीतून मंत्री महोदय माघारी?

महाराष्ट्र काँग्रेसमध्ये अंतर्गत गटबाजीमुळे नाराजीनाट्य सुरू असल्याचं समोर आलं आहे. आज मुंबईत काँग्रेसच्या महत्वाच्या नेत्यांची बैठक बोलवण्यात आली होती. कामगार मंत्री अशोक चव्हाण, महसूल मंत्री बाळासाहेब थोरात, प्रदेशाध्यक्ष नाना पटोले यांसोबत काँग्रेसचे बडे नेते या बैठकीला उपस्थित होते. मात्र, ऊर्जामंत्री नितीन राऊत यांना संबंधित बैठकीचं निमंत्रण दिलं आहे की नाही, यावर प्रश्नचिन्ह उपस्थित केलं जात आहे. (Nitin Raut news)

नितीन राऊत या बैठकीसाठी पोहोचले. मात्र, दरवाजातूनच माघारी फिरले. त्यामुळे काँग्रेसच्या वरीष्ठ नेत्यांच्या बैठकीत नाराजीनाट्य दिसलं. बैठकीत सहभागी न होताच राऊत माघारी फिरल्याने त्यांच्या निमंत्रणाबाबत शंका उपस्थित होत आहे. काँग्रेसचे महाराष्ट्र प्रभारी एच.के. पाटील यांच्या उपस्थितीत आज महत्वाच्या नेत्यांची बैठक बोलवण्यात आली. त्यावेळी हा प्रसंग घडला.

महाविकास आघाडी सरकारमध्ये काँग्रेसच्या नेत्यांना निधी मिळत नसल्याच्या तक्रारी सुरू आहेत. याआधी देखील ऊर्जा मंत्र्यांच्या खात्याला अर्थमंत्री अजित पवारांनी पैसे देण्यासाठी नकार दर्शवला होता. वीजबिलाची थकबाकी देण्यासंदर्भात हा विषय ऐरणीवर आला होता. राऊत यांनी मुख्यमंत्र्यांना ऊर्जा मंत्रालयाला निधी उपलब्ध करून देण्यासाठी पत्र लिहिलं होतं. याचसोबत राज्यातील मनपा निवडणुकांसाठी काँग्रेसची रणनीती ठरवण्यावर या बैठकीत खलबतं सुरू आहेत.