पोलिसांनी चोरीला गेलेला दिड कोटींचा मुद्देमाल नागरिकांना केला परत

डोंबिवली - चोरी, दरोडा, घरफोडी, फसवणूक अशा अनेक गुन्ह्यांची उकल कल्याण परिमंडळ 3 च्या पोलिसांनी केली आहे. 80 गुन्ह्यांमधील सुमारे 1 कोटी 50 लाखाचा मुद्देमाल पोलिसांनी चोरट्यांकडून मिळविला असून या मुद्देमालाची त्या त्या ग्राहकांना बुधवारी हस्तांतरण करण्यात आले असल्याची माहिती अपर पोलिस आयुक्त दत्तात्रय शिंदे यांनी दिली.

कल्याण परिमंडळ 3 अंतर्गत एकूण 8 पोलिस ठाणे येतात. कल्याण डोंबिवली शहरात गेल्या काही महिन्यांपासून चोरी, दरोडा, फसवणूक, घरफोड्या यांसारख्या गुन्ह्यांची उकल करण्यासाठी पोलिस पथकांची विशेष नेमणूक करण्यात आली आहे. या पथकांनी उत्तम कामगिरी करत अनेक गुन्ह्यांची उकल आत्तापर्यंत केली आहे. यातील 80 गुन्ह्यात सुमारे 1 कोटी 50 लाखाचा मुद्देमाल पोलिसांनी हस्तगत केला आहे. यात कल्याण विभागातून 47 गुन्ह्यांची उकल करत 41 लाख 56 हजाराचा मुद्देमाल हस्तगत करण्यात आला आहे. तर डोंबिवली विभागातून 33 गुन्ह्यांची उकल करत 1 कोटी 9 लाखाचा मुद्देमाल हस्तगत करण्यात आला आहे. चोरीच्या गुन्ह्यांची संख्या ही सर्वाधिक म्हणजेच 38 असून 53 लाख 11 हजाराचा मुद्देमाल यात जप्त करण्यात आला आहे. त्याखालोखाल मिसिंगचे 13 व घरफोडीचे 12 गुन्हे उकल करण्यात आली आहे. तर फसवणूकीचे 5 गुन्हे त्यातून 48 लाख 58 हजाराचा मुद्देमाल जप्त करण्यात आला आहे.

स्वातंत्र्याच्या अमृत महोत्सव दिनाचे औचित्य साधत बुधवारी कल्याण परिमंडळ 3 परिसरातील वेगवेगळ्या गुन्ह्यातील हस्तगत केलेला मुद्देमाल अप्पर पोलिस आयुक्त दत्तात्रय शिंदे आणि कल्याण परिमंडळ 3 चे पोलिस उपायुक्त सचिन गुंजाळ यांच्या उपस्थितीत फिर्यादी आणि मुळ मालकांना हस्तांतरीत करण्यात आला. यावेळी कल्याण सहाय्यक पोलिस आयुक्त उमेश माने पाटिल, डोंबिवलीचे सुनिल कुराडे, वरिष्ठ पोलिस निरिक्षक उशोक होनमाणे, नरेंद्र पवार, सर्जेराव पाटील, बशीर शेख, सचिन सांडभोर, शेखर बागडे, पंढरीनाथ भालेराव, अजय आफळे यांसह इतर पोलिस अधिकारी उपस्थित होते.