Alibag News : वनहक्‍क जमीनधारकांनाही यंदा एक रुपया पीक विम्‍याचा लाभ; आज शेवटचा दिवस

Alibag - जिल्ह्यातील वनहक्क जमिनीधारक शेतकऱ्यांनीही एक रुपया पीक विमा योजनेचा लाभ घ्यावा, योजनेत सहभागी होण्याची अंतिम मुदत, सोमवारी ३१ जुलै आहे. जास्तीत जास्त शेतकऱ्यांनी सर्वसमावेशक पीक विमा योजनेमध्ये सहभाग नोंदवावा, असे आवाहन जिल्हा अधिक्षक कृषी अधिकारी उज्ज्वला बाणखेले यांनी केले आहे.

खरीप हंगाम २०२३-२४ मध्ये केवळ एका रुपयात प्रधानमंत्री पीक विमा योजना राबविण्यात येत आहे. खरीप हंगामात भात व नाचणी या पिकांचा समावेश करण्यात आला आहे. जिल्ह्यातील ज्या शेतकऱ्यांना वन जमिनीचे वाटप करण्यात आले आहे.

अशा जमिनीची नोंद दळी प्लॉट (वनखंड) स्वरूपात आहे.अशा वनजमिनीबाबत सातबारा उतारे पीक विमा पोर्टलवर येत नसल्याने, जिल्ह्यातील असे अनुसूचित जमाती व इतर वननिवासी शेतकऱ्यांच्या नावे सातबारा उतारे निघत नाहीत.

वनहक्कधारक (दळी प्लॉट) शेतकरी व ७/१२ संगणीकृत न झालेल्या शेतकऱ्यांची जमीनधारणा दस्तावेजांच्या मर्यादा लक्षात घेऊन जिल्ह्यातील भात व नाचणी पीक घेणारे व पीक विमा योजनेमध्ये सहभागी इच्छिणाऱ्या शेतकऱ्यांनी संबंधित तालुका कृषी अधिकाऱ्यांशी संपर्क साधून पीक विमा हप्ता रुपये एक भरून तसेच आवश्यक कागदपत्रे जमा करावीत,असे आवाहन बाणखेले यांनी केले आहे