"हे तुझं प्रॉडक्शन हाऊस नाही"; अनन्याला समीर वानखेडेंनी फटकारलं

क्रुझ रेव्ह पार्टी प्रकरणात केंद्रीय अमली पदार्थविरोधी पथकाने NCB शुक्रवारी अभिनेत्री अनन्या पांडेची Ananya Pandey सलग दुसऱ्या दिवशी चार तास चौकशी केली. मात्र चौकशीला उशिरा पोहोचलेल्या अनन्याला एनसीबीचे विभागीय संचालक समीर वानखेडे Sameer Wankhede यांनी फटकारलं. चौकशीसाठी ११ वाजता बोलावलं असताना अनन्या दुपारी दोन वाजता एनसीबी कार्यालयात पोहोचली होती. 'इथे अधिकारी तुझी वाट पाहत बसलेले नाहीत. हे तुमचं प्रॉडक्शन हाऊस नाही, केंद्रीय तपास यंत्रणेचं कार्यालय आहे. तुम्हाला ज्या वेळी इथे बोलावलं आहे, त्यावेळी पोहोचायला हवं', अशा शब्दांत वानखेडेंनी अनन्याला सुनावलं.

शुक्रवारी अनन्या तिचे वडील चंकी पांडेंसह एनसीबी कार्यालयात पोहोचली होती. सलग चार तास तिची चौकशी करण्यात आली. तिच्या चौकशीतून अद्याप ठोस पुरावा मिळाला नसल्याचं सूत्रांचं म्हणणं असून अनन्याला सोमवारीदेखील चौकशीसाठी एनसीबीनं बोलावलं आहे. शुक्रवारी अभिनेता शाहरूख खान याचा बॉडीगार्डदेखील एनसीबी कार्यालयात दाखल झाला होता. त्याने एक बंद लिफाफा एनसीबीकडे दिल्याचं सांगण्यात आलं.

आर्यन खानबरोबर अनन्याचे ड्रग्जसंबंधी मोबाईलवरील व्हॉट्स अ‍ॅपवर चॅटचे पुरावे एनसीबीकडे आहेत. यातूनच अनन्याची चौकशी एनसीबी करीत आहे. गुरुवारी एनसीबीने अनन्याच्या वांद्रे इथल्या घरावर छापेमारी करीत तिचा मोबाईल व लॅपटॉप जप्त केला होता. त्यानंतर तिची मुंबई एनसीबी ऑफिसमध्ये चौकशी करण्यात आली होती. क्रुझ रेव्ह पार्टी प्रकरणात आर्यन खान सध्या आर्थर रोड कारागृहात आहे. अनन्या आणि आर्यन हे लहानपणापासून मित्र आहेत. आर्यन, अनन्या आणि आर्यनची बहीण सुहाना हे नेहमी एकत्र वेळ घालवताना दिसायचे.