तपास यंत्रणांच्या छाप्यात नावं घुसवली जातील? संजय राऊतांना शंका

संजय राऊत यांनी पुन्हा एकदा केंद्रीय तपास यंत्रणांवर हल्लाबोल केला. मुंबईत आज सकाळपासून ईडी (ED) आणि एनआयएकडून (NIA) छापे टाकण्यात येत आहेत. त्यामध्ये काही मोठे नेते तपास यंत्रणांच्या रडारवर असल्याचं समजतंय. त्यानंतर संजय राऊत (Sanjay Raut) यांनी आपल्या खास शैलित तपास यंत्रणांवर टीका केली आहे. ते म्हणाले तपास यंत्रणा राष्ट्राच्या सुरक्षिततेसाठी काम करत असतील तर त्यांचं स्वागत आहे. मात्र या कारवाईत नेत्यांची नावं आहेत की, ते घुसवले जातील हे पाहणं महत्वाचं असल्याचं ते म्हणाले आहेत. (ED And NIA Raids in Mumbai)

मुंबईत ईडीकडून आज सकाळी अचानक मोठी कारवाई सुरू करण्यात आली आहे. अंडरवर्ल्डशी संबंधीत लोकांच्या जागांवर छापे टाकण्यात येत आहेत. इकबाल कासकर आणि हसिना पारकर यांच्याशी संबंधीत काही मालमत्तांवर ही कारवाई सुरू असल्याचं समजतंय. मुंबईतील मोठे नेते देखील ईडीच्या रडारवर असल्याचं समजतंय. फक्त महाराष्ट्र आणि मुंबईच नाही तर दिल्लीतून देखील तपास पथकं मुंबई आल्याचं समजतंय.