'आँधी से कहो औकात में रहे', ईडीची छापेमारी सुरू होताच राऊतांचं ट्वीट

शिवसेना नेते संजय राऊत यांनी मोदी सरकार आणि केंद्राच्या हातातील यंत्रणांवर गंभीर आरोप केले आहेत. या यंत्रणांचा वापर राज्यातील महाविकास आघाडी सरकार पाडण्यासाठी होत असल्याचं त्यांनी म्हटलं. संजय राऊत आज यासंदर्भात पत्रकार परिषद घेऊन पुरावे देखील देणार आहेत. त्यामुळे राजकीय वातावरणात चर्चा आहेत. (Sanjay Raut on ED)

ईडीचा पर्दाफाश करणार असल्याचंही ते म्हणाले. मात्र, त्याआधीच मुंबईत ईडीने धाडसत्र सुरू केलं. यामध्ये एक मोठा नेता देखील रडारवर असल्याचं कळतंय. आता संजय राऊत यांनी सूचक ट्वीट केल्याने सगळ्यांच्या भुवया आणखी उंचावल्या आहेत. (Sanjay Raut Tweet)

संजय राऊत यांनी दिवंगत शायर राहत इंदौरी यांचा शेर पोस्ट केला आहे. शाख़ों से टूट जाएँ वो पत्ते नहीं हैं हम, आँधी से कोई कह दे कि औक़ात में रहे! या ओळी शेअर केल्याने संजय राऊत काय बोलणार याकडे सर्वांचं लक्ष्य लागलं आहे.

संपत्ती कराराबाबत ईडीने धाडी टाकल्या आहेत. अंडरवर्ल्डचा या करारामध्ये पैसा असल्याच्या संशयावरून ही कारवाई केली जात असल्याची चर्चा आहे. ईडी आणि एनआयएला ठोस पुरावे मिळाल्यानं या धाडी टाकल्या जात आहेत. यामध्ये मोठ्या राजकीय नेत्यांचा समावेश असल्याचंही समोर येत आहे. शिवसेनेच्या पत्रकार परिषदेपूर्वी ED ची ही कारवाई होत असल्यानं राजकीय वर्तुळात चर्चा रंगली आहे.

दाऊद कनेक्शन

मुंबईत आज सक्तवसुली संचलनालयाने १० ठिकाणी ठापे टाकले. अंडरवल्ड डाॅन दाऊद इब्राहिम याची बहीण हसीना पारकरच्या घरी ही कारवाई सुरू आहे. दाऊदच्या मालमत्ता खरेदी विक्री व्यवहारात मनीलाँडरिंग झाल्याचा संशय ईडीला आहे. या व्यवहारात महाराष्ट्रातील एका नेत्याचा हात असल्याचा संशय असल्याचा संशय असून त्या अनुषंगाने तपास सुरू असल्याची माहिती सूत्रांनी दिली आहे.