नालेसफाईत मोठा घोटाळा? 'विरप्पन गॅंग'वर कारवाईची मनसेची मागणी

मुंबई महापालिकेचा 104 टक्के नालेसफाईचा दावा शिवसेनेकडून करण्यात आला होता. त्यानंतर मुंबईत नालेसफाईत कोट्यवधी रुपयांचा घोटाळा झाल्याचा गंभीर आरोप महाराष्ट्र नवनिर्माण सेनेकडून करण्यात आला आहे. मनसे सरचिटणीस संदीप देशपांडे यांनी यासंदर्भात एक व्हिडिओ शेअर केला आहे. साकीनाका येथील नालेसफाईचा व्हिडिओ दाखवत नाल्यातील गाळ नाही तर डेब्रिजची वाहतूक कंत्राटदारांनी केली असल्याचा आरोप संदीप देशपांडे यांनी केला आहे. त्यांच्या या आरोपामुळे खळबळ उडाली आहे. (scam in Nallesafai MNS sandeep deshpande demands action shivsena)

मनसेने साकीनाका येथील व्हिडीओ सादर केला आहे. डंपरमध्ये डेब्रिज भरलं जातय आणि वरच्या थरात गाळ टाकला जात आहे. अशाप्रकारने डेब्रिजची वाहतुक कंत्राटदारांकडून केली जात आहे. गाळाचे वजन वाढविण्यासाठी कंत्राटदाराकडून हा प्रकार केला जात आहे. त्यामुळे आतापर्यंत नाले सफाईत कोट्यवधी रुपयांचा घोटाळा झाला असल्याचा दावा संदीप देशपांडे यांनी केला.

मुंबई महापालिकेत जे विरप्पन बसले आहेत त्यांच्यावर करवाई करण्याची हिंमत महापौर यांनी दाखवावी. मुंबई महापालिकेतील विरप्पन गॅंगची चौकशी करा, अशी मागणी संदीप देशपांडे यांनी केली आहे. संदीप देशपांडे यांच्या या गंभीर आरोपानंतर शिवसेना काय पाऊलं उचलते हे पाहावं लागणार आहे. दरम्यान, नाल्यातील गाळ काढण्यासाठी दरवर्षी कंत्राट दिले जातात.