वडापावचं आमिष अंगलट? एसटी कर्मचारी पोलिसांच्या जाळ्यात

एसटी कर्मचारी आझाद मैदानातून पोलिसांनी बाहेर काढल्यानंतर सीएसएमटी रेल्वे स्थानकावर येऊन बसले होते. त्यांनी तिथेही आंदोलन करण्याचा प्रयत्न केला, सुरुवातीला कर्मचारी आक्रमक होऊ नयेत म्हणून पोलिसांनी देखील नरमाईची भूमिका घेतली. (ST worker strike)

मात्र काही काळानंतर कर्मचारी ऐकत नसल्याने पोलिसांनी त्यांना १८ क्रमांकाच्या फलाटावर नेलं.

यानंतर त्यांनी हालण्यसाठी नकार दिल्यानंतर पोलिसांनी आक्रमक पवित्रा घेतला. पोलिसांनी आंदोलनकर्त्यांना ताब्यात घेण्यासाठी प्रयत्न केले. मात्र छत्रपती शिवाजी टर्मिनसवर संपकऱ्यांनी त्यांच्या भूमिकेवर ठाम राहण्याचं ठरवलं. याठिकाणी घोषणाबाजी करण्यात आली. अखेर पोलिसांनी शक्कल लढवत वडापावचं आमिष दाखवलं. यानंतर घटनेला वेगळं वळण मिळालं. (st worker strike latest news)

वडापावची बातमी संपकऱ्यांमध्ये पसरली. कर्मचाऱ्यांना ताब्यात घेण्यासाठी पोलिसांनी 'वडापाव मिळेल, असं सांगितलं. सगळ्यांनी 18 नंबर फलाटावर चला' असं आश्वासनही दिलं. आणि तेच वडापाव खाण्यासाठी 18 क्रमांक फलाटावर आलेल्या एसटी कर्मचारी पोलिसांच्या सापळ्यात अडकले. नंतर पोलिसांनी या कर्मचाऱ्यांना आपल्या ताब्यात घेऊन पोलीस ठाण्यात नेलं आहे. त्यामुळे एसटी कर्मचाऱ्यांना वडापावची हाव अंगलट आल्याची चर्चा आहे. यासंदर्भात 'साम'ने वृत्त दिलंय.