मध्य रेल्वेचे वराती मागून घोडे, लोकलमध्ये 'कृपया इथे बसू नये' वाक्यांचे स्टिकर

मुंबई:  लॉकडाऊननंतर पहिल्यांदाच 15 जूनपासून अत्यावश्यक सेवेतील कर्मचाऱ्यांसाठी मध्य रेल्वे मार्गावर लोकल सुरू केली. त्यानंतर विविध घटकातील कर्मचाऱ्यांनाही लोकलमध्ये प्रवासाची परवानगी दिली. मात्र लोकलमधील प्रवाशांची सतत गर्दीच दिसून येत असल्याने सोशल डिस्टन्सिंगचा फज्जा उडाल्याचे चित्र आहे. त्यामुळे यापूर्वीच रेल्वेने सोशल डिस्टन्सिंग पाळण्यासाठी उपाययोजना करण्याची गरज असताना तब्बल पाच महिन्यानंतर रेल्वे सोशल डिस्टन्सिंग पाळण्यासाठी डब्यातील आसनांवर स्टिकर लावत असल्याचे दिसते आहे.

मध्य रेल्वेच्या मुख्य मार्गावर लोकल डब्यांमध्ये मंगळवारी प्रवाशांना अचानक आसनांवर स्टिकर दिसून आलेत. त्यावर कृपया इथे बसू नये अशा वाक्यांचे स्टिकरवर संदेश लिहिण्यात आले आहे. त्यामुळे काही डब्यांमध्ये प्रवाशांची गर्दी कमी असल्याने काही प्रवासी स्टिकर लावलेली जागा सोडून प्रवास करताना दिसून आले. तर काही डब्यांमध्ये मात्र, प्रवाशांची गर्दी आणि सोशल डिस्टन्सिंगचा फज्जा नेहमीप्रमाणे दिसून आला आहे.

मुंबई विभागातल्या बातम्या वाचण्यासाठी येथे क्लिक करा.

लोकल प्रवासातील गर्दी कमी करण्याच्या दृष्टीने रेल्वेने स्थानकांवर उद्घोषणा, फलक लावले आहे. मात्र, डब्यांमधील प्रवाशांची गर्दी कमी करण्यात आणि प्रवाशांना कोविड 19 च्या नियमांची अंमलबजावणी करण्यात मध्य रेल्वे अयशस्वी ठरली असल्याचे प्रवासी संघटना आरोप करत आहे. त्यानंतर आता दिल्लीसह काही राज्यांमध्ये कोरोनाची दुसरी लाट आली आहे. महाराष्ट्रातही मुंबई, पुणे, औरंगाबाद या शहरांमध्ये कोरोनाची आकडेवारी वाढताना दिसत असल्याने, रेल्वे प्रशासन जागी झाल्याचे दिसते आहे. मात्र काही प्रवासी संघटनांकडून रेल्वे प्रशासनावर टीका केली जात आहे. काहींनी रेल्वेचा स्तुत्य उपक्रम असल्याच्या प्रतिक्रिया दिल्या आहे.

अधिक वाचा-  प्रताप सरनाईक मुंबईबाहेरुन आल्यानं क्वारंटाईन, ईडीला विनंती पत्र सादर करणार

 मध्य रेल्वे मार्गावरील लोकल मध्ये सोशल डिस्टन्सिंग पाळण्यासाठी रेल्वे प्रशासनाकडून स्टिकर लावण्यात येत आहे. नुकतेच या प्रकारचा उपक्रम सुरू केला आहे. 
शिवाजी सुतार, मुख्य जनसंपर्क अधिकारी, मध्य रेल्वे
 
वाढत्या कोरोना बधितांच्या आकडेवारीमुळे लोकल मधील प्रवाशांमध्ये सोशल डिस्टन्सिंग अत्यंत आवश्यक आहे. एका प्रवाशाची जागा रिकामी सोडून बसत असल्याने प्रवाशांमध्ये वादविवादाच्या घटना घडल्या आहे. मात्र रेल्वेने स्टिकर लावल्यामुळे वादविवादाच्या घटना टळणार असून सोशल डिस्टन्सिंग पाळण्यास मदत होणार आहे.
सुभाष गुप्ता, अध्यक्ष, रेल्वे यात्री परिषद

रेल्वे डब्यात लावण्यात आलेल्या स्टिकरचा आता, काहीच उपयोग होणार नाही. प्रवाशांची गर्दी लक्षात घेता याचे काटेकोर पालन होणे शक्य नाही. त्याशिवाय प्रवासी ऐकणार नाही.
आशा डीसुजा, महिला संघटक, के3 रेल्वे प्रवासी संघटना

------------------------------------

(संपादन- पूजा विचारे)

Stickers with phrase Please don't sit here local coaches Railways effort social distance