‘दलित पॅंथर’चा सुवर्ण महोत्सव राज्यभर साजरा करणार

मुंबई, ता. १३ : दलित पॅंथरच्या स्थापनेला यंदा ९ जुलै रोजी ५० वर्षे पूर्ण होत आहेत. त्यानिमित्त संपूर्ण राज्यात दलित पॅंथरचा सुवर्णमहोत्सव साजरा करणार असल्याची घोषणा आज रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी वांद्रे येथील वोक्हार्ट हॉलमध्ये केली.

दलित पॅंथर सुवर्णमहोत्सवी वर्षानिमित्त राज्यभरातील विचारवंत साहित्यिक आणि पॅंथर कार्यकर्त्यांच्या आज झालेल्या बैठकीत सर्व संमतीने दलित पॅंथर सुवर्णमहोत्सव समिती स्थापन करण्यात आली. ९ जुलै रोजी दलित पॅंथरचा सुवर्णमहोत्सव सोहळा साजरा करण्याचा निर्णय बैठकीत घेण्यात आला. त्यानुसार राज्यात उत्तर-पश्चिम महाराष्ट्र, कोकण, विदर्भ, मराठवाडा आदी सर्व विभागांत कार्यक्रम घेण्यात येणार आहेत. दलित पॅंथरचे प्रमुख नेते-कार्यकर्ते यांचा सन्मानही करण्यात येणार आहे. दिवंगत पॅंथर कार्यकर्त्यांच्या कुटुंबीयांचा सन्मान दलित पॅंथर सुवर्णमहोत्सव समितीतर्फे करण्याचा निर्णयही घेण्यात आला. समग्र आंबेडकरी चळवळीच्या वतीने सर्वांना सोबत घेऊन सुवर्णमहोत्सव साजरा करण्यात येणार आहे.

दलित पॅंथर अन्यायाचा प्रतिकार करणारे ऐतिहासिक संघटन ठरले आहे. दलित पॅंथरमुळे प्रेरणा घेऊन देशभर दलितांसाठी अनेक संघटना निर्माण झाल्या. दलित पॅंथर ही तरुणांना अन्यायाचा प्रतिकार आणि न्यायासाठी लढा शिकवणारी प्रेरणादायी संघटना आहे. त्यामुळे अन्यायाविरुद्धच्या आक्रमकतेला आणि दलित तरुणांमधील लढाऊ वृत्तीला प्रेरणा देत राहावे यासाठी ऐतिहासिक ठरलेल्या दलित पॅंथरचा सुवर्णमहोत्सव साजरा करणे आम्हाला महत्त्वाचे वाटते, असे आठवले म्हणाले.

अविनाश महातेकर, अर्जुन डांगळे, माजी मंत्री चंद्रकांत हंडोरे, बबन कांबळे, राही भिडे, दिलीप जगताप, गौतम सोनवणे, प्रेम गोहिल, सुरेश सावंत, विजय साबळे आदी अनेक मान्यवर बैठकीला उपस्थित होते.