पोलिसांसोबत हुज्जत घालणे पडले महागात,

पोलिसांशी हुज्जत घालणे पडले महागात न्यायालयाने ठोठावला पाच हजारांचा दंड पाली, ता. १३ (वार्ताहर) : पालीमध्ये वाहतूक पोलिसांकडून वाहनचालकांची तपासणी सुरू आहे. यादरम्यान वाहनचालकांची कागदपत्रे व परवाना तपासला जात आहे. या वेळी एका नागरिकाने पोलिसांना सहकार्य न करता पोलिसांशी हुज्जत घातली. त्यामुळे पाली न्यायालयाने या व्यक्तीला पाच हजाराचा दंड ठोठावला, अशी माहिती गुरुवारी (ता. १३) पाली पोलिस स्थानकाचे पोलिस निरीक्षक विश्वजीत काइंगडे यांनी दिली. पाली-खोपोली रस्त्यावर गणेश हॉटेलजवळ बिरप्पा कलप्पा पुजारी (वय ३८) हा वाहन परवाना नसताना मोटरसायकल चालवत असताना आढळून आला. त्याच्याकडे कागदपत्रांची मागणी केली असता त्यांनी पोलिसांशी हुज्जत घातली. याप्रकरणी पोलिस हवालदार ज्ञानेश्वर जाधव यांनी फिर्याद दाखल केली होती. पोलिसांनी त्याला प्रथमवर्ग न्यायदंडाधिकारी पाली यांच्यासमोर हजर केले. या वेळी न्यायालयाने पुजारी याला पाच हजारांचा दंड ठोठावला आहे.