मुख्यमंत्री रोजगार निर्मिती कार्यक्रमातून जिल्ह्यात मेळावे

अलिबाग, ता. ७ (बातमीदार) : रायगड जिल्ह्यातील बेरोजगार तरुणांना रोजगाराची संधी मिळावी. यासाठी रायगडचे जिल्हाधिकारी डॉ. महेंद्र कल्याणकर यांच्या पुढाकारातून जिल्ह्यात ठिकठिकाणी मेळाव्यांचे आयोजन करण्यात आले आहे. मुख्यमंत्री रोजगार निर्मिती कार्यक्रम अंतर्गत वेगवेगळ्या योजनांची जनजागृती होण्यासाठी तालुकास्तरावर हे कार्यक्रम घेण्यात आले.

रायगड जिल्ह्यातील पनवेल, रोहा, श्रीवर्धन, महाड, माणगाव या तहसील कार्यालयात मेळावे घेण्यात आले. मेळाव्यांना दोनशेहून अधिक युवक-युवतींनी सहभाग घेतला होता. यामध्ये मुख्यमंत्री रोजगार निर्मिती कार्यक्रम योजनेची सविस्तर माहिती देण्यात आली. लाभार्थ्यांना योजनेंतर्गत लाभ देताना येणाऱ्या अडचणी व त्यांचे निराकरण या विषयाबाबत जिल्हा अग्रणी बँक व्यवस्थापक विजयकुमार कुलकर्णी यांनी मार्गदर्शन केले. जिल्हा उद्योग केंद्राचे महाव्यवस्थापक जी. एस. हरळय्या व व्यवस्थापक श्याम चकोर तसेच उद्योग निरीक्षक यांच्यामार्फतही उद्योग उभारणीसाठी विविध योजनांची माहिती देण्यात आली.