अमली पदार्थप्रकरणी नायजेरियनला अटक

अमली पदार्थप्रकरणी नायजेरियनला अटक ३३ लाखांचे कोकेन जप्त; अमली पदार्थविरोधी पथकाची कारवाई सकाळ वृत्तसेवा मुंबई, ता. २५ ः मुंबई पोलिसांच्या अमली पदार्थविरोधी पथकाने मशीद बंदर परिसरातून ३३ लाखाचे कोकेन जप्त केले. या प्रकरणी एका नायजेरियन व्यक्तीला अटक केली आहे. मुंबई पोलिसांच्या अमली पदार्थविरोधी पथकाच्या आझाद मैदान युनिटचे प्रभारी पोलिस निरीक्षक राजेंद्र दहिफळे यांना मशीद बंदर परिसरात एक नायजेरियन व्यक्ती संशयास्पद रीतीने फिरताना दिसला. पोलिसांनी हटकताच त्याने पळ काढला. पोलिसांनी मोठ्या शिताफीने त्याला अटक केली. त्याची झडती घेतली असता त्याच्याकडे ११० ग्रॅम कोकेन सापडले. त्याची आंतरराष्ट्रीय बाजारातील किंमत ३३ लाख आहे. बोएगा हबीब अबुबकर (वय ४५) असे नायजेरियन आरोपीचे नाव आहे. २०१९ साली तो मुंबईत आला. सध्या तो वसईत राहत असल्याचे तपासात उघड झाले. अंमली पदार्थाची तस्करी करणारी त्याची मोठी टोळी असण्याची शक्यता वरिष्ठ पोलिस निरीक्षक राजेंद्र दहिफळे यांनी सांगितले. न्यायालयाने त्याला २९ डिसेंबरपर्यंत पोलिस कोठडी सुनावली आहे.