साकीनाका परिसरात तरुणीची निर्घृण हत्या

साकीनाका परिसरात तरुणीची हत्या प्रियकराला पोलिसांकडून अटक मुंबई, ता. ६ ः मुंबईच्या साकीनाका परिसरात २९ वर्षांच्या तरुणीची हत्या करण्यात आल्याचे उघडकीस आले आहे. मनीषा जाधव असे तिचे नाव आहे. मनीषाचा प्रियकर राजू निळे (४२) यानेच तिची हत्या केल्याची माहिती पोलिसांनी दिली असून त्याला अटक केली आहे. मनीषा आणि राजू तीन वर्षे साकीनाका परिसरात लिव्ह इन रिलेशनशिपमध्ये राहत होते. मनीषा घरकाम करत होती. राजू टीव्ही दुरुस्तीचे काम करत होता. त्याचे आधीही एक लग्न झालेले होते. तो जेव्हा आपल्या पहिल्या बायकोला भेटायला जायचा तेव्हा मनीषाचे त्याच्याशी भांडण व्हायचे. नेहमीप्रमाणेच राजू त्याच्या पत्नीला भेटायला गेला होता. त्याचा राग आल्याने मनीषा आणि त्याच्यात पुन्हा जोरदार भांडण झाले. रागाच्या भरात राजूने खलबत्ता मनीषाच्या डोक्यात मारला. चाकूने तिच्या गळ्यावर वार केले. पोलिसांना मनीषा जखमी अवस्थेत आढळली. तिला घाटकोपरच्या राजावाडी रुग्णालयात दाखल करण्यात आले, परंतु उपचारांदरम्यान तिचा मृत्यू झाला. पोलिसांनी राजूवर गुन्हा दाखल केला आहे.