कोस्टल रोडसमोर आव्हान मच्छीमारांच्या विरोधाचे | Sakal
sakal

बोलून बातमी शोधा

कोस्टल रोडसमोर आव्हान मच्छीमारांच्या विरोधाचे
कोस्टल रोडसमोर आव्हान मच्छीमारांच्या विरोधाचे

कोस्टल रोडसमोर आव्हान मच्छीमारांच्या विरोधाचे

sakal_logo
By
कोस्टल रोडसमोर आव्हान मच्छीमारांच्या विरोधाचे मिलिंद तांबे स्थानिक मच्छीमारांचा विरोध डावलून कोस्टल रोडच्या एका भागाचे काम रेटण्याचा प्रयत्न सुरू झाल्याने तापलेले पाणी अधिक उसळी मारू लागले आहे. पारंपरिक व्यवसाय उद्ध्वस्त होईल, अशा भीतीपोटी उभ्या राहिलेल्या मच्छीमारांच्या आंदोलनामुळे कोस्टल रोडचे बांधकाम दोन महिन्यांपासून रखडले आहे. कोस्टल रोड प्राधिकरण मात्र या प्रकल्पामुळे मुंबईतील वाहतूक सुरळीत होईल, असे सांगण्याचा प्रयत्न करत आहे. तज्ज्ञांच्या समितीने तपासणी करून प्रकल्पाचा आराखडा बनवला असल्याचे सांगत आहेत. त्याचाच घेतलेला आढावा... मुंबईत सध्या मासेमारीचा हंगाम सुरू आहे. दोन महिन्यांहून अधिक काळ वरळी कोळीवाड्यातील सुमारे २०० मच्छीमार दररोज सकाळी आपल्या बोटी मच्छीमारीसाठी बाहेर काढत नाहीत. दुसरीकडे कोस्टल रोडचे बांधकाम बंद पाडायला आणि त्या कामावर लक्ष ठेवण्यासाठी सध्या त्यांची हालचाल सुरू आहे. २० सप्टेंबरपासून कोस्टल रोड बांधकामाच्या निषेधार्थ, वरळीतील क्लिव्हलँड बंदरातून सुमारे २५ मोटरवर चालवलेल्या आणि मोटारी नसलेल्या बोटी रात्रंदिवस जेट्टीभोवती पार्क करण्यात येत आहेत. मच्छीमार आपल्या मागण्यांसाठी आक्रमक झाल्याने कोस्टल रोडचे बांधकाम १२ वेळा बंद करावे लागले. त्यावर आता वरळी पोलिसांनी कारवाई सुरू केली आहे. पोलिसांनी आंदोलकांना नोटिसा बजावण्यासाठी सुरुवात केली आहे. बेकायदेशीरपणे आंदोलन केल्यास आरोपपत्र दाखल केले जाईल, असा इशाराही त्यांनी दिला आहे. त्यासाठी सध्या कोळीवाड्याजवळील जेट्टीवर पोलिसांचा पहारा बसवण्यात आला आहे. मात्र या इशाऱ्यानंतरही मच्छीमार आपल्या मागण्यांवर ठाम आहेत. कोस्टल रोड प्रकल्पामुळे वरळी जेट्टीच्या शेवटी येणाऱ्‍या दोन खांबांमधील अंतर वाढवा, असे त्यांचे म्हणणे आहे. कोस्टल रोड हा १०.५८ किलोमीटर लांबीचा मरिन ड्राईव्हपासून वांद्रे-वरळी सी-लिंकच्या वरळीपर्यंत जाणारा रस्ता आहे. ... मच्छीमारांचा पुलांना विरोध हाजी अलीमध्ये मरिन लाईन्सच्या दक्षिणेकडील कोस्टल रोडचे काम सुरू असून, त्यावर प्रशासन लक्ष ठेवून आहे. वरळीजवळ मुंबई महापालिका वांद्रे-वरळी सी-लिंकला कोस्टल रोडशी जोडणारे दोन पूल बांधण्यात येणार आहेत. त्यालाच मच्छीमारांनी विरोध केला असून त्यामुळे काम दोन महिन्यांपासून रखडले आहे. वरळीजवळील क्लिव्हलँड बंदर वरळी कोळीवाड्यातील २०० कुटुंबांना आधार देते. त्यात नाखवा, मच्छीमार आणि किरकोळ विक्रेते गुंतलेले आहेत. हा व्यवसाय आजचा नाही तर किमान एक शतक जुना असल्याचे येथील जुन्या मच्छीमारांचे म्हणणे आहे. मुंबई महापालिका कोस्टल रोडच्या वरळीच्या टोकाला एक इंटरचेंज बांधत आहे, जो सध्याच्या वांद्रे-वरळी सी-लिंकला जोडेल. क्लिव्हलँड बंदरापासून समुद्राच्या आत फक्त एक किलोमीटर अंतरावर इंटरचेंजचे बांधकाम सुरू असलेले खांब बोटींसाठी उपलब्ध असलेला एकमेव जलवाहतूक मार्ग बाधित करतील, असे मच्छीमारांचे म्हणणे आहे. सध्या क्लिव्हलँड बंदरामधून बाहेर पडल्यानंतर बोटींना खडकाळ आणि अवघड वाटेवरून मार्गक्रमण करावे लागत आहे. सध्या समुद्राच्या खोलात न जाता आगाफी किनाऱ्याजवळील उथळ पाण्यातील लहान आणि पारंपरिक मासेमारी छोट्या मच्छीमारांच्या उदरनिर्वाहासाठी गरजेची आहे. सध्या वांद्रे-वरळी सी-लिंकला आधार देणाऱ्या ३० मीटर अंतर असणाऱ्या दोन खांबांमधून बोटी जातात. त्या ठिकाणी इंटरचेंज आल्यावर बोटींना पुन्हा चार खांबांमधून जावे लागेल. सध्याच्या योजनेनुसार पालिका खांबांमध्ये ६० मीटर अंतर ठेवणार आहे. मात्र, ते अंतर पुरेसे नसल्याचा दावा मच्छीमारांनी केला आहे. ... व्यवसाय पूर्णपणे नष्ट होण्याचा धोका आमच्या बोटी सुरक्षितपणे ने-आण करण्यासाठी आम्हाला किमान २०० मीटर अंतराची आवश्यकता आहे, असे वरळी कोळीवाडा नाखवा व्यवहार सहकारी सोसायटीचे संचालक नितेश पाटील म्हणाले. समुद्रात वारा आणि लाटा मोठ्या प्रमाणावर असतात. त्यामुळे बोटी हेलकावे खाण्याचा धोका अधिक असतो. एक जोरदार लाट किंवा अचानक येणाऱ्या वाऱ्यामुळे लहान बोटी खांबांवर आदळून फुटू शकतात, अशी भीतीही पाटील यांनी व्यक्त केली आहे. सी-लिंकच्या खांबांनी आधीच आमची गती कमी केली आहे आणि आता आणखी दोन पुलांमुळे आमचा व्यवसाय पूर्णपणे नष्ट होण्याचा धोका असल्याचे पाटील म्हणाले. एका ठराविक वेळी एकाहून अधिक बोटी या खांबांमधून जाऊ शकत नाहीत. खांबांमुळे त्यांचा वेग कमी झाला आहे, असेही ते म्हणाले. आराखडा तज्ज्ञांच्या मार्गदर्शनाखाली : पालिका कोस्टल रोड प्रकल्पाचा आराखडा तज्ज्ञांच्या मार्गदर्शनाखाली अभ्यास करून तयार करण्यात आल्याचे महापालिकेचे म्हणणे आहे. मच्छीमारांसाठी सध्याच्या वांद्रे-वरळी लिंक रोडच्या दोन खांबांमधील स्पष्ट अंतर १७ मीटर आहे आणि बोटी केवळ एकाच ठिकाणाहून जाऊ शकतात. तरीही मुंबई कोस्टल रोड प्रकल्पामध्ये बोटींना तीन स्पॅनमधून जाऊ दिले जाणार आहे. प्रत्येक स्पॅनमधील अंतर ५६ मीटर आहे, असे पालिकेचे म्हणणे आहे. महाराष्ट्र मेरिटाईम बोर्डाने जारी केलेल्या भारतीय अंतर्देशीय जलमार्ग प्राधिकरणाच्या मार्गदर्शक तत्त्वांनुसार, ३० मीटरचा नेव्हिगेशन कालावधी पुरेसा आहे, असे पालिकेचे म्हणणे आहे. मार्गदर्शक तत्त्वांनुसार, वाहतुकीसाठी नेव्हिगेशन स्पॅन बोटीच्या रुंदीच्या आठ पट असणे आवश्यक आहे. राज्याच्या मत्स्यव्यवसाय विभागाच्या आकडेवारीनुसार, वरळी जेट्टीवरील सर्वांत मोठे परवानाधारक वाहन १०.४ मीटर लांब आणि ३.८ मीटर रुंद असून त्याची वाहून नेण्याची क्षमता चार हजार ९८० किलो आहे आणि पाण्याची खोली ३.६ मीटर आहे. त्यानुसार दुहेरी गाडीसाठी नेव्हिगेशन स्पॅन कमाल ३०.४ मीटर असायला हवा. मात्र, मुंबई कोस्टल रोड प्रकल्पामध्ये ६० मीटरचा नॅव्हिगेशनल स्पॅन देण्यात आला आहे. तो गरजेपेक्षा दुप्पट आहे, असेही सांगण्यात आले. अनभिज्ञ अधिकारी तोडगा कसा काढणार? प्रकल्पाच्या बांधकामादरम्यान मच्छीमारांना नुकसानभरपाई देण्यासाठी, धोरण तयार करण्यासाठी टाटा सामाजिक विज्ञान संस्थेची नियुक्ती करण्यात आली आहे. ऑक्टोबरमध्ये झालेल्या बैठकीत, महापालिका आयुक्त इक्बालसिंह चहल यांनी इंटरचेंज पुनर्रचनेच्या मच्छीमारांच्या मागण्यांचा स्वतंत्र आढावा घेण्यासही सहमती दर्शवली. तथापि पालिकेने मच्छीमारांना एक स्वतंत्र, तांत्रिक समिती नियुक्त करण्यास सांगितले आहे, जी त्यांच्या मागण्यांबाबत कोणताही पक्षपात न करता पुनरावलोकन करू शकेल. मात्र, त्यालाही मच्छीमार संघटनांचा विरोध असल्याचे मच्छीमार दीपक पाटील यांनी सांगितले. समुद्र किंवा मच्छीमारीचा कोणताही अनुभव नसलेले किंवा समुद्रातील अडचणीशी अनभिज्ञ असलेले अधिकारी त्यावर कसा तोडगा काढणार, असा प्रश्नही पाटील यांनी विचारला आहे.
Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top