डोंबिवली : मानपाडा पोलीस ठाण्यात आरोपीचा मृत्यू!

डोंबिवली : मानपाडा पोलिस ठाण्यात (Manpada Police station) विनयभंगाच्या आरोपाखाली (Molestation case) अटकेत असलेल्या आरोपीचा मृत्यू झाला. याप्रकरणी मानपाडा पोलिसांनी आकस्मित मृत्यूची नोंद केली आहे. मानपाडा पोलिस ठाण्यात ५ फेब्रुवारीला विनयभंगाचा गुन्हा दाखल करण्यात आला होता. यातील आरोपी दत्तात्रय वारके (culprit duttatray warke Death) याचा पोलिस शोध घेत होते. २६ फेब्रुवारीला जळगाव येथून पोलिसांनी त्याला अटक केली होती. रविवारी (ता. २७) त्याला कल्याण न्यायालयात हजर केले असता न्यायालयीन कोठडी मंजूर केली.

दत्तात्रय यास कल्याणमधील आधारवाडी कारागृहात दाखल करण्यापूर्वी कोरोना चाचणी करणे अनिवार्य होती. त्यानुसार मानपाडा पोलिसांनी त्याला पोलिस ठाण्यातील विलगीकरण कक्षात ठेवले होते. विलगीकरणात असताना रविवारी सायंकाळी फिट येऊन तो जमिनीवर पडला. त्याला उपचारासाठी कल्याण-डोंबिवली महापालिकेच्या शास्त्रीनगर रुग्णालयात दाखल करण्यात आले; मात्र उपचार सुरू असतानाच रात्री त्याचा मृत्यू झाल्याचे डॉक्टरांनी घोषित केले. शवविच्छेदन अहवालानंतर दत्तात्रय याच्या मृत्यूचे कारण स्पष्ट होईल, असे पोलिसांनी सांगितले.