महिलांच्या क्रिकेट स्पर्धेत सातपाटी संघ विजयी

पालघर, ता. ८ (बातमीदार) ः जागतिक महिला दिनानिमित्ताने उमरोळी येथे महिलांची क्रिकेट स्पर्धा आयोजित केली होती. बहुजन विकास आघाडी पुरस्कृत महिला क्रिकेट स्पर्धेत चुरशीच्या लढतीत अंतिम सामना बरोबरीने सुटल्याने नाणेफेक सातपाटी संघ विजेता ठरला; तर जिजाऊ फायटर संघ उपविजेता उमरोळी ठरला.
स्पर्धेत सोळा संघांनी सहभाग नोंदवला होता. अंतिम सामन्यात आम्ही सातपाटीकर संघाला चषक व ११ हजार १११, जिजाऊ फायटर उमरोळी संघाला चषक व ७ हजार ७७७, तृतीय व चतुर्थ क्रमांकाचे पारितोषिक दोन हजार ५५५ व चषक जिजाऊ टेंभोडे व फायर पास्थळ संघांना प्रदान करण्यात आले. या वेळी वूमन ऑफ द सीरिजचे पारितोषिक सातपाटी संघातील दुषाली धनू हिने पटकावत मानाची पैठणी साडीसुद्धा पटकावली. त्याचबरोबर उत्कृष्ट फलंदाज म्हणून ही चषकावर नाव कोरले. उत्कृष्ट गोलंदाज म्हणून प्रज्ञा पाटील, वुमन ऑफ द मॅच स्वाती घरत यांना रोख पारितोषिक देऊन गौरविण्यात आले.
या वेळी बोईसर विधानसभेचे आमदार राजेश पाटील, पंचायत समिती सदस्य धनश्री पाटील, जिल्हा परिषद सदस्य भावना विचारे, धनश्री रेवदंडेकर, पी. टी. पाटील, प्रभाकर पाटील, रश्‍मी पाटील, मधुकर पाटील, अनिल सिंग, सुरेखा कांबळे आदी मान्यवर उपस्थित होते.