मंगलमय दिव्यांची अमावास्या

पाली, ता. १८ (वार्ताहर) : गटारी नव्हे तर मंगलमय दिव्यांची अमावास्या! हा संदेश देऊन सुधागड तालुक्यातील सिद्धेश्वर शाळेत सोमवारी (ता. १७) ‘दीपपूजा’ उत्साहात साजरी करण्यात आली.
कार्यक्रमाच्या सुरुवातीला तबकामध्ये दिव्यांची पूजा करण्यात आली. त्यानंतर आपली मंगलमय संस्कृती जपूया! हा संदेश दिला. दीपपूजा साजरी करण्याची वैज्ञानिक कारणे शिक्षक जनार्दन भिलारे यांनी विद्यार्थ्यांना समजावून सांगितली. मुख्याध्यापिका रोहिणी खामकर यांनी दीपपूजेनंतर श्रावण महिन्यात शाकाहार करण्यामागची शास्त्रीय कारणे सांगितली. या उपक्रमास विद्यार्थ्यांनी उत्स्फूर्त प्रतिसाद दिला. कार्यक्रमप्रसंगी शाळा व्यवस्थापन समिती अध्यक्ष रवींद्र यादव, उपाध्यक्ष नितीन यादव, सदस्या प्रभावती जाधव, पालकवर्ग व विद्यार्थी उपस्थित होते. या उपक्रमाचे गटशिक्षणाधिकारी साधुराम बांगारे व केंद्रप्रमुखा अलका फोंडे यांनी कौतुक केले. कार्यक्रमाचे सूत्रसंचालन रूपा पांपटवार यांनी केले.